近年多咗音響品牌進軍iPod喇叭市場，但講到「老資格」，要數美國音響名牌Bose。各位對於其第一代SoundDock仍然記憶猶新，日前推出的第三代SoundDock 10，更將Bose出晒名嘅Waveguide技術加入細小嘅機身，音場造得夠闊，如果唔係親身試聽，都未必相信咁靚嘅音色，竟然是出自機仔細細嘅SoundDock 10。
大家一向都覺得iPod喇叭同偶像歌手一樣，只係賣樣唔賣聲，不過SoundDock向來嘅開發方針都係靚聲先行，在原有經典設計上加入既美觀又實用嘅新點子，同時將音質進一步提升，即使到第三代仍見驚喜。
改良技術 啱細音箱
要開發靚聲iPod喇叭嘅最大難題係機箱太細，難以將高階技術放到咁狹小嘅空間，於是Bose就改良自家嘅Waveguide技術，把管道長度由原來七十五吋縮減至五十二吋，配合六吋直徑的低音喇叭，經過精心設計及反覆測試後，低音輸出比起過往的SoundDock系列更加厚實。同時機箱內嘅零件擺放位置都經過重新編配，一方面從機底引入冷空氣，另一方面熱空氣也會向上排出，解決咗機身太細容易造成過熱嘅問題。
同時兼顧 人聲樂器
低音方面有Waveguide技術幫助，而中高音就交由Bose專利嘅Twiddler單元負責，一個單元可以同時處理高音同中音，音域輸出廣闊；以古典樂章及人聲一試，樂器聲跟女聲嘅表現都相當清澈，每個音節之間既變化都細緻分明，效果出色，並非一般iPod喇叭可比。SoundDock 10亦配合專利嘅數碼訊號處理系統，減低音源失真，實試效果相當唔錯。
藍芽插座 無線播歌
SoundDock嘅機身設計都有唔少特別之處，例如機身前端嘅iPod Dock位置，其實亦係避震系統嘅一部分，就算將音量調校到最大，都唔會令iPod出現震動，確保能穩定播放。另外，針對Apple經常為新iPod或iPhone更換Docking連接嘅問題，SoundDock用上可換式插座設計，無論係現有或將來推出嘅iPod或iPhone，都可以透過更換唔同插座而作出支援。此外，可換式插座更預留升級空間，例如換上即將面市嘅藍芽插座，便能方便地將儲存在藍芽手機內嘅音樂，串流到SoundDock 10上播放，又或者推出支援其他播放器嘅插座，整體配套相當完善，抵讚！
同場加映
全屋靚聲Virtually Invisible 791
家庭影院音響系統通常只得一個「皇帝位」，想成家睇片時都聽到靚聲嘅話，可以考慮安裝上一對Virtually Invisible 791喇叭。每隻喇叭以四枚螺絲鑲在天花板之上，可以令聲音平均分布房間的每個角落，而且更能對應Bose Lifestyle SA-3及SA-2立體聲擴音機使用。
無線享樂SoundLink
就算冇用iPod，屋企部電腦裏面都一定有唔少數碼音樂，只要用上這款新出嘅SoundLink，就可以無線串流播放電腦內嘅歌曲檔；機身還配備Bose Waveguide喇叭技術以及釹磁單元，音色不俗，更特別係隨機附送鋰電，戶外都玩得到。
查詢：2123 9000