Melody（陳若嵐）經常在各大影會出沒，被龍友長短火圍捕就試得多，今日拎住全球最輕換鏡相機GXR，都話要變身龍女影個夠！行到公園用Ricoh廣角鏡玩完Snapshot，再換支GR微距鏡影花花，最正係連CCD都可換埋拍高清，一部160g機仔想點變就點變。

近來GF1、PEN等換鏡DC大行其道，連向來玩型格的Ricoh都加推首部換鏡GXR，不過今次唔係Micro 4/3或者GR潮機改裝，而是採用全新「智能鏡頭」規格，將鏡頭、感光元件和影像處理器融合成可拆式組件，對比傳統只能換鏡的單反，確係夠Gimmick！

GXR將機身和鏡頭分開賣，淨機身配支最平的24-72mm「入門」組合都要$6,900，貴過部單反!	一拉活門（紅圈）便可將鏡頭拆下來，方便將來接上硬碟機、打印機等裝置。	多了三粒快捷鍵，分別操控DIRECT簡易介面、內置閃燈和ViewFinder/LCD。

換鏡連CCD唔怕入塵

以往CCD固定在相機機身，由八百萬像素、一千萬像素到一千二百萬像素，差不多每年都要升級換機，而GXR採用創新的智能鏡頭，換鏡後連CCD都可以升級，機身可以跟足你一世。官方表示新設計除了可防止入塵，更能對鏡頭和感光元件作出最佳的優化，就算身處沙塵滾滾的惡劣環境，都能輕易換鏡影靚相。

機背ADJ.滾輪可作快捷鍵和快門調控，亦多了八向操控。	Melody逛公園見到啲花花咁靚，即刻想換支Macro鏡影大特寫。	只需按住活門一拉，就將成個鏡頭拆咗出來。

三合一創意無限延伸

對於影友而言，這種由鏡頭跟感光元件和處理器組成的三合一設計，可讓拍攝設定儲存在鏡身內，唔使每次換鏡都再重新設定，都幾方便。好似Melody原本用支Ricoh 24-72mm CCD鏡頭抓拍，換上GR 50mm CMOS鏡頭便可跳至720p拍高清，預計將來還會加推硬碟、迷你打印機等組件，令GXR變身成PMP及流動印相中心，創意無限延伸。

影完花花草草，Melody去到餐廳飲嘢，隨手拆鏡，改用CMOS拍高清短片，非常方便。	Ricoh 24-72mm鏡頭焦距同GX200一樣，但CCD就換上GRD III處理器，雜訊處理更佳。	換上GR 50mm Macro鏡頭後，利用手動對焦環影花蕊大特寫，效果截然不同。

九十二萬像素靚芒

其實GXR的操控和介面均沿自GR系列，備有電子水平尺、全按抓拍和多種場景模式，GR粉絲一定唔會陌生。別以為拆掉智能鏡頭後，GXR好似剩番個殼，由於機身內置獨立處理器和記憶體，仍可透過機背的九十二萬像素靚芒睇相和進行後期處理。只不過鏡頭連CCD的設計，勢必令換鏡成本增加，單係支GR定焦CMOS鏡就索價六千幾元，唔少玩家都表示要睇定啲先入貨。

GXR沿用3吋92萬像素LCD芒，操作介面與GR系列接近，最正係換鏡時識自動感應設定。

轉盤備有手動和場景模式，依然咁有機仔Feel，用開GR或GX的玩家一定不會陌生。

GXR機身

屏幕：3吋92萬像素LCD

儲存：內置86MB、

　　　支援SD/SDHC卡

介面：USB 2.0、HDMI、

　　　AV輸出

其他：場景模式、DIRECT拍攝介面、電子水平尺

尺寸：113.9×70.2×28.9mm

重量：160g

Ricoh 24-72mm鏡頭

感光元件：1,001萬像素CCD

鏡　　頭：24-72mm三倍變焦

最大光圈：F2.5-F4.4

快　　門：180秒-1/2000秒

尺　　寸：68.7×57.9×38.6mm

重　　量：161g

GR 50mm Macro鏡頭

感光元件：1,230萬像素CMOS

鏡　　頭： 50mm Macro定焦

最大光圈：F2.5

快　　門：180秒-1/3200秒

尺　　寸：68.7×57.9×71.3mm

重　　量：263g

查詢：2292 5111