為咗做個精明師奶，經常都睇書，自我增值嘛！
响灣仔住嘅Anita報料話呢幾日灣仔修頓遊樂場有大型書展，會場設有三大特價區，包括新書八折特價區、$20特價區同$10超值特價區。今年大會仲首次推出「人人捐書」活動，帶埋新、舊書籍到攤位，就可以換取$5書券一張！經篩選後，書籍會轉贈福利機構或團體畀有需要人士取閱，多捐多得呀！此外，大會仲有多場精彩表演，鼓勵大家閱讀之餘都要多做運動，話唔定下屆東亞運有你份參賽啦！
2009灣仔書展─閱讀在修頓
日 期：即日至12月20日
時 間：11:00am至8:00pm
地 點：灣仔修頓遊樂場
主辦機構︰灣仔區議會文化及康體事務委員會、香港書刊業商會
查 詢：3119 0255
美國啲百貨公司，每年聖誕節都會做超級大減價，估唔到有品牌效法呢種傳統！
Che Che每年都會响紐約總店大搞Flea Market，上年首次响香港總店搞，可惜當日我後知後覺，最尾嗰兩日先去掃貨，結果心儀嘅嘢全部賣晒！今年佢哋再接再厲，依然响大坑總店大搞跳蚤市場，由Che Che設計師一針一線創作出的手作製品，有創意又有心思，仲要平到爆！大部分貨品低到$10起咋！今年我一定殺佢一個片甲不留囉！
Che Che跳蚤市場
日期：即日至12月21日
時間：12:00nn至8:00pm
地點：大坑摩頓台七號（中央圖書館側）
查詢：2882 2979
義賣羊咩咩
最近婦女界流傳一個重要消息，就係婦女動力基金嘅「得意羊羊的88日」義賣行動，基金一向致力協助基層、弱勢婦女及青少年服務工作，佢哋今次義賣兩款得意羊咩咩，所籌得嘅款項會用作下年度嘅撥款工作。何謂88呢？原來係指每年十二月十日國際人權日至翌年三月八日國際婦女節之間嘅八十八日，呢段日子係基金每年籌募撥款經費嘅時期，作為婦女界嘅一分子，當然要支持吓啦！
「得意羊羊的88日」義賣行動
日 期：12月19日至20日
時 間：12:00nn至6:00pm
地 點： 中環港鐵中環站A出口（19日）
尖沙咀天星碼頭（20日）
查 詢：2794 1100
特色木偶劇
响Facebook八到單商場料，原來新城市廣場正展出三十件逾五十年歷史嘅經典木偶，總值超過一百萬港元，當中一個捷克木偶婆婆「身價」更高達二十萬港元，真係嘩嘩聲！不過最吸引叻太係商場請嚟捷克布拉格最著名嘅木偶劇團Truhlar Marionety，於十二月二十四及二十五日首度嚟港演出重新編排嘅聖誕劇目，並以傳統手搖琴現場伴奏，咁精彩，點可以錯過！
「捷克戲偶大匯演Puppet Show」
日 期：12月24至25日（每日一場）
時 間：3:00pm至3:30pm
地 點：新城市廣場第三期一樓
查 詢：2684 9175
細路扮郵差
同學仔媽咪Winnie約我星期日帶埋囝囝，一齊去扮小郵差。原來海港城响場內搞咗個迷你版郵局，又有郵政車，又有櫃位，十足十真嘅一樣，只要喺指定日期消費滿指定金額又或捐款，小朋友就可參與聖誕小郵局工作坊，着住特設嘅Mini Post小郵差制服、孭上郵差袋，Cosplay醒目小郵差，响工作人員帶領下體驗郵差叔叔嘅工作，好搞鬼喎！
「聖誕小郵局@海港城」工作坊
日 期：12月19至20日及
2010年1月2至3日
時 間︰2:00pm至6:00pm
地 點：海港城海運大廈地下KidX
參加辦法︰於海港城任何商戶消費滿$1,000或以上；或於海港城SportX之「郵．愛傳遞」概念店內消費滿$500或以上，又或捐款$40予「香港血癌基金」，即可報名參加。（名額有限，先到先得）
查 詢：2118 8666
叻太起底
年齡：30以上40未滿
職業：全職家庭主婦
家庭狀況：家有老公及4歲囝囝