本年度亞洲遊戲展（AGS）將於十日後揭幕，最大參展商SCEH日前畀傳媒試玩了一系列新遊戲嘅金碟，當中焦點肯定係《Gran Turismo 5》（簡稱GT5），並將於展館劃出「GT Zone」專區，提供專用駕駛座外，仲有兩部遊戲中登場嘅真車壓場，大排長龍都要玩！

唔去唔得《GT5》之父到場

《Gran Turismo 5》

類型：駕駛模擬　平台：PS3

推出日期：明年三月

今次將會在香港公開嘅《GT5》試玩版，同之前九月在東京遊戲展中展出嘅一樣，唔同係今次係大家都有機會落場試玩，只收錄咗日本城市賽道，表面睇無乜急彎，不過試玩日所見，包括筆者等幾位傳媒朋友都無法在指定時間內到達Check Point，難度之高超出預期。畫面表現相當好，街道景色以至光源處理都相當像真。雖然試玩版只有四款跑車選擇，不過車廂內觀點就做足一百分，無輪軚環及儀表板等細節，都真到O嘴。據知「GT之父」山內一典仲會在本月二十五日到場，親身發表更多《GT5》嘅資料，唔去點得！

GT Zone 預想圖	車廂內視點像真度極高，軚環及儀表板都似足真車。	試玩版嘅對手都幾難纏，明明已經過頭，對手突然失驚無神啄你尾，令車身打轉。

《Sonic and SEGA All-stars Racing》

類型：賽車　平台：PS3

推出日期：明年二月

由Sonic及SEGA角色擔任主角嘅賽車遊戲，玩法同《孖寶賽車》差唔多，角色造型有趣，又可以在賽道執道具整鬼對手，而且操作相當簡單，小朋友都易上手，會場上就有「家庭遊戲區」畀參觀者試玩。

手提機類別《胖公主》升呢

《胖公主：蛋糕一把》

類型：動作　平台：PSP　

推出日期：明年二月

PSN遊戲《胖公主》一炮而紅，今次升呢到PSP平台，玩法大同小異，都係「質肥」敵方公主及搶奪己方公主，玩落依然有Fun！

《Metal Gear Solid Peace Walker》

類型：動作　平台：PSP　

推出日期：明年三月

「蛇叔」重出江湖執行任務，以PSP機能做到咁出眾嘅效果已算唔錯，試玩時仲有好詳盡嘅訓練模式幫大家熟習操作，抵讚！

18禁類別 血花四濺

《Aliens vs Predator》

類型：射擊　平台：PS3　

推出日期：明年二月

畫面處理極度出色，刺激感十足，正因血肉橫飛而被列為「18禁」，FPS迷必玩。

《God of War III》

類型：動作　平台：PS3　

推出日期：明年三月

玩開《God of War》系列嘅玩家，都會畀佢嘅故事背景及殘忍動作吸引，今集更加將暴力血腥昇華，例如試玩時可以爬上單眼怪大佬嘅頭頂，監生扯甩佢隻眼，膽細者咪玩！

紀念品曝光

截稿前已經收到十幾份紀念品嘅資料，只要在現場作出指定消費，就可以拎走有關紀念品，今次先為大家介紹部分特別版紀念品。

無論買本月十七日推出嘅《Final Fantasy XIII》遊戲或連PS3主機同綑套裝，都有機會得到日本特典限量海報，限量二百套！

想拎走AGS特別版TORO貓八達通套裝（有卡又有毛公仔），就要消費滿$3,000；另外會場限定版《AC2》Ezio Figure（全球限量八個），就要買齊PS3版及PSP版《AC2》先有機會得到。

Game Show小資料

名稱：亞洲遊戲展×香港網絡遊戲展2009

日期：本月24至27日

地點：香港會議展覽中心五號館

時間：10:00am-8:00pm

票價：$25

網址：http://www.asiagameshow.com/