問答題：「數碼相架有甚麼功能？」一年前的答案只是瀏覽相片、座枱時鐘；一年後嘅今日，仲可以填上迷你CD音響以及iPod喇叭呢兩個功能。Panasonic新推出嘅數碼相架MW-10，就將數碼相架結合微型音響系統，一部機可以睇相、聽歌兼播iPod影片，買一得三。

肯變肯增值嘅數碼相架，事實上都唔止MW-10一部，之前有另一牌子已經將打印機加入數碼相架之中，相信往後推出嘅數碼相架一定會愈變愈有趣，趁聖誕節買來送畀人都唔錯！

iPod Dock設在機背，插入後完全睇唔到iPod/iPhone畫面，靠晒附送的遙控器操作。	放大圖片	採用4cm Full Range竹製喇叭單元，都算幾好聲。

隱蔽式iPod插座

若然要將音響系統嘅概念加入數碼相架，以今時今日嘅標準，冇可能會欠缺iPod插座。不過一般iPod喇叭都係擺放在機頂或機身前方，好似MW-10咁隱蔽，將iPod Dock擺在機背就真係少有，明顯係要遷就九吋顯示屏嘅擺位。由於插入後完全睇唔到iPod畫面，操作時靠晒遙控器以及MW-10嘅顯示屏。另外，現階段MW-10只可顯示到英文，呢期啱用來播英文聖誕歌。

機身設有耳筒插口，等各位可以靜心欣賞，唔怕嘈到人。	可經由SD卡，將數碼影像檔案儲存到機內的4GB記憶體。	就算以雙畫面顯示，都睇得好舒服。

竹製喇叭音色靚

MW-10顯示屏下方有一列窄長嘅喇叭位，雖然設計簡單，但實際播放時音色確係唔差，全因佢採用竹製單元以及在機背加入低音箱，低音實淨，音色更見柔和，拍得住唔少貴價iPod喇叭。另外，MW-10亦少有地內置埋CD碟盤，不過擺位有啲隱蔽，要揭開機面顯示屏先能夠入碟，既可以播到iPod又可播到音樂CD，聽歌夠晒方便。有需要嘅話，甚至可以為MW-10接上天線變身成FM/AM收音機，認真多選擇。

機內設有四種不同主題款式，可因應喜好隨意更換。	可以自行調校數碼影像的光暗度及顯示模式。	支援放大功能，想睇清楚相片的細節一樣冇問題。

雙畫面顯示多變

除可直讀SD卡或內置4GB記憶體上的相片外，亦支援放入CD睇相，好似早幾年燒落嘅旅行相光碟，唔使先將佢儲存到記憶卡都一樣睇得番。最特別係MW-10加入咗雙畫面設計，以左右畫面顯示唔同資訊，例如一邊顯示時鐘，一邊播放相片幻燈片；或者一邊顯示歌曲播放清單，另一面則顯示日期時間，配搭多變，善用每吋顯示空間。同時更支援簡單的執相功能如旋轉、調整光暗、轉變顯示模式等，功能相當實用，如果可以播埋DVD就Perfect啦！

機檔案

顯示屏： 9吋WVGA LCD

支援播放媒體： CD（Audio、JPEG）、SD卡（JPEG）、iPod（Audio、Movie）

音效總輸出： 10W

體　　　　積： 252×202×150mm

重　　　　量： 1.9kg

查詢：2833 0955