提起慢動作重播，即時諗起大導演吳宇森，由Mark哥飛身開槍，到《赤壁》周瑜幫趙雲擋箭等經典場面。至於Gadgets界慢拍潮流就由相機帶起，最近再由日系手機接棒。最新SoftBank 940SH便全球首創45fps連拍速度，可以連影一百張相，就算要影低勇奪香港東亞運第一金的BMX車手王史提芬衝線一刻，都冇難度！

對人類肉眼而言，每秒二十五格的畫面已非常流暢，再高嘅拍攝速度，以正常速度播放便會變成慢動作。早於一年多前，Casio EX-F1已創下1,200fps嘅相機紀錄，後來傳到DV界的Sanyo HD1010亦有300fps，等咗咁耐，今日終於連手機都有得玩。

想拍下本屆東亞運BMX冠車王史提芬比賽時的英姿，940SH的一百張連拍功能就大派用場。

連我踩得咁快都影到，勁!（設計對白）

捕捉瞬間影像

雖然940SH連拍速度冇咁癲，但仍影到每秒四十五張相，只要按下快門不放，更能一口氣連拍一百張相片，真係快過一般3fps嘅手機多多聲。可能有人會問連拍咁快有咩用？其實速度愈快，愈能捕捉到平時肉眼看不見的影像細節，好似子彈穿過硬物或氣球被篤爆一刻等瞬間影像，重看時效果往往令人嘆為觀止。但為顧及儲相速度，在45fps模式下相片會自動「降呢」至QVGA質素，想有更好質素的話就要改選3fps，解像度會回彈至一千二百萬像素，有辣有唔辣！

快門鍵好細粒，就算有三重防手震，建議影相時還是雙手揸機較穩陣。	外置屏幕都好大，可睇到國際時間及短訊。	機背設計好鬼Pro，仲要有埋光學變焦，等閒DC都要行埋一邊。

瘦面美顏假大眼

連拍以外，手機的硬件亦是賣點，搭載了一千二百萬像素CCD感光元件及28mm廣角鏡頭，並配備LED補光燈及ISO 12,800感光度，影夜景自然又Wide又清。其他影相分唇亦好豐富，有齊自動對焦、臉部追蹤、微笑快門、防手震及SCN場景，而且最多可同時偵測十張人臉，剛好夠影晒十兄弟。另外，一如今季日系手機潮流，940SH亦支援美顏模式，透過ProPix圖像處理器便能自動幫你瘦面、執靚皮膚甚至整假大眼，啱啱瞓醒都可以影到好似上妝咁靚。

可預先登記主角臉孔，以後㩒個掣便能搵番晒佢嘅相片，唔使大海撈針。	美顏以外，仲可以加入復古等不同特效，淨係Effect都有排玩！	今次加入Wi-Fi連接功能，用3.4吋芒睇on.cc真係好爽！

首現Wi-Fi上網

940SH延續經典旋屏摺疊式設計，坐擁3.4吋FWVGA解像度、New Mobile ASV液晶屏幕，座枱睇片真係靚到絕，最重要係唔止得個樣，還支援多點觸控，開合手指就能拉大相片。940SH另一突破是首次出現的Wi-Fi功能，透過內置瀏覽器便能還原HTML或Flash網頁，比以往日系機只能齋Talk實用得多。惟注意手機也有缺點，例如「圈外」問題未解決，3仔台會收唔到，另外電池唔襟用，齋影五十張一千二百萬像素相片都幾乎冇電，買之前要有心理準備。

實拍測試

連拍 即使是3fps連拍，在千二萬像素解像度下，相片實淨冇鬼影，抵讚！	廣角 28mm廣角連ICC都影得晒，仲冇咩變形，可惜略嫌曝光過度。	微距 花瓣花蕊都影得清楚，但始終景深唔夠，主體未算突出。

機檔案

制　　式︰GSM三頻、WCDMA

內置屏幕︰3.4吋1,677萬色TFT，480×854

解像度

外置屏幕︰1.4吋單色，64×192解像度

鏡　　頭︰1,210萬像素CCD

記　憶　體︰內置220MB，支援microSDHC

記憶卡 （最高16GB）

對外連接︰藍芽2.1、USB 2.0、Wi-Fi

通話時間︰210分鐘 （GSM）、200分鐘（3G）

備用時間︰300小時 （GSM）、340小時 （3G）

體　　積︰111×51×16mm

重　　量︰約130g

查詢︰2374 0618