《Final Fantasy XIII》公價$649，淨Game計應該係近年最貴嘅遊戲，雖然肉赤少少，但只要睇過佢超靚嘅CG過場動畫，機迷都會覺得值回票價！《FF XIII》完全發揮到次世代遊戲主機嘅優點，場景做到勁靚，而且故事情節細致，改良咗嘅新世代ATB系統仲好考大家嘅即時反應同戰略頭腦，聖誕節點都要豪一次買番隻看門口！
要睇靚CG動畫，《FF》系列一向冇令過玩家失望，今集《FF XIII》更用盡次世代主機嘅高超繪圖技術，即使遊戲進行中嘅畫面，都似足睇CG。
新ATB系統考反應
咁高價買隻遊戲返嚟，當然唔只係睇動畫咁簡單，其實《FF XIII》都作出唔少改良，例如戰鬥場面變得更快更直接，行行吓遇到敵人便會即時轉入戰鬥畫面，玩家要馬上決定到底是發動攻擊、防衞還是使用魔法，而改良咗嘅ATB系統就會根據使出的招式，從而加快或減慢ATB嘅流失速度，所以都幾考玩家嘅出招次序和組合。戰鬥時更可以透過新加入嘅Optima系統，即時轉換角色嘅職務，因應形勢選用最強組合迎戰，玩落更刺激。
善用立體水晶石
遊戲另一改動係用於角色成長嘅「水晶石」系統，今次這塊水晶石已用上立體化結構，由多層晶石堆疊而成，而且每個職務都有各自唔同嘅水晶石，甚至連每個角色都唔會一樣。大家可以將打低敵人時所賺到嘅水晶點數，逐點逐點配置入水晶，不過要完全發揮水晶石嘅威力，最好係就住角色嘅特性同戰鬥需求嚟作出針對性優化，雖然難度幾高，但組合變化多端，亦係玩《FF XIII》嘅一大樂趣。
召喚獸更有霸氣
《FF》系列嘅最大特色就係唔同角色有唔同嘅召喚獸，雖然今集到依家仍未公布晒所有種類，不過有樣見嘅召喚獸都整得好有睇頭，好似主角之一Hope嘅召喚獸，係身形龐大嘅機械人Alexander，當以駕駛模式操作時更會從遠處召來零件搭建成裝有砲台嘅堡壘，甚有霸氣；另外，Vanille嘅召喚獸Hecatonchires，就取材自希臘神話嘅百臂巨人。至於已成為《FF》系列吉祥物嘅陸行鳥，今集遊戲設計師就為佢換上更英氣嘅造型，當路經寶藏時就會自動在頭頂彈出感嘆號，認真幫到手！
銅鑼灣擺檔率先試玩
SCEH專登為《FF XIII》在銅鑼灣SOGO對面短租咗間地舖，化身成「Final Fantasy XIII幻想之壘」，十一號開始就可以畀玩家入去親身體驗呢款RPG大作，而各位Cosplayer一樣可以着起《FF》服裝到場參加「Final Fantasy Cosplay大募集」！
地點：銅鑼灣怡和街1-1L號香港大廈地下A1舖
日期：十二月十一日至十七日
時間：上午十時至晚上十時
彩罐《FF XIII》飲品¥200
今次日本Suntory更同Square Enix合作推出一套十六款彩繪罐裝嘅「Final Fantasy XIII聖靈藥」檸檬味飲料。每罐賣二百日圓（約$18），趁佳聖誕假期去日本玩嘅朋友，不妨掃幾罐帶番香港收藏！
查詢：2341 2356
機檔案
類 型：角色扮演
開 發：Square Enix
平 台：PS3
推出日期：12月17日
售 價：$649（遊戲）/ $3,248（主機同捆版）