香港地，四驅車通街都見到，不過又有幾多車主，真係識揸住部車攀山涉水？早前香港越野路華（Land Rover）代理邀請咗一班嚟自馬來西亞嘅Off-road能手，參與Land Rover Experience Training 2009活動，即場示範各種越野技術，令在場嘅車主及傳媒都大開眼界。

今次活動喺早排冷鋒壓境時舉行，地點係元朗大棠附近一個私人場地，當日氣溫喺15℃以下，仲落大雨，個地唔爛就奇，至於示範車款就有Defender、Freelander及Range Rover。遠道由大馬來港嘅越野專家Rambo及一眾徒弟，早就駐場恭候；唔只個名夠威，據知佢仲有份參與新加坡F1賽道及多個馬來西亞越野賽事路線嘅設計工作，係大馬嘅車壇高手，過江龍是也！

活動開始前，車主等人一邊凍到震騰騰、一邊先嚟合照一張。	大清早一場大雨後，車隊喺元朗浩浩蕩蕩出發。	越野專家Rambo：「有我教路，Off-road冇難度！」（設計對白）

闖蕩森林睇手勢

Rambo好坦白咁同大家講，Off-road駕駛確係危機處處，就以當日為例，朝早落完雨後，本來尚算實淨嘅泥路，都變成一片爛泥，行車時好易就陷入泥濘中被卡住，Rambo教路向前行嘅時候，要緊記口訣「As slow as possible」、「As Fast as necessary」，仲要記實步驟：「Look」、「Risk Access」、「Plan & Drive」等。

大扭力 唔使亂畀油 Rambo示範Defender嘅強大扭力，毋須加油，已經爬到近45°嘅斜坡。	溝通足 放心大踏步 領航員落車探路後，向車手發出手號前進，兩者都要溝通清楚。	免空轉 畀力出深坑 車輪踩入大坑時，就要運用差速器，將空轉車輪嘅動力分布至其他輪胎，部車先夠力甩身。
慢慢來 過橋咪心急 過橋屬高難度動作，呢種情況下，就要好好實踐「As slow as possible」嘅理論。

簡單嚟講，駕駛者要同領航員溝通清楚，落車細心觀察前路、評估形勢及計劃好路線後，先至付諸實行，當駛到危險位置時，就盡可能細心慢駛，環境有變才加速盡快離開。Rambo又以個人經歷為例，雀鳥、野獸，加埋流水聲，其實森林原來都幾嘈吵，所以駕駛員與領航員未必可以時時刻刻都用說話溝通，尤其是領航員落車指揮時，車手必須跟足他嘅手勢指示去揸。

唔使加油照爬坡

講解過後，大家就浩浩蕩蕩向叢林進發，Rambo就駕駛Defender親身示範，點樣喺唔加油嘅狀態下，仲可以爬坡、落坡及側爬，最令人印象深刻係輪胎陷於大坑時如何自救，當大家都一籌莫展被考起時，Rambo就啟動車內嘅ETC及DSC，發指令畀差速鎖，將動力由空轉嘅車輪改去其他輪胎，部車就夠力走出大坑脫險。第日有機會進行Off-road駕駛又遇着大坑嘅話，大家知點做啦！

查詢：2713 2383（Land Rover HK）