日本出的靚手機一般留番畀本土國民玩，輸入法自然以日文為主。然而，唔知係咪終於察覺到海外市場龐大，兼順便照顧班中港台留學生，年初起陸續有日系手機提供五筆、拼音中文輸入法。但講徹底，還要數今季新出的Docomo F-01B，創「瀛機」先河支援手寫輸入，郁吓手指頭就入到日文漢字！

日系手機向來可以輸入日文漢字，但就要熟讀五十音先用到，打個中文SMS要成年咁耐，真係講起都勞氣！直到年初Docomo N-02A終於打破常規，首度內建中文輸入法，因此就算冇中文介面，水貨一出依然大把人要！

提供千二萬像素鏡頭及LED補光燈，右方則是指紋感應器，可代替密碼來開機，防止別人偷取資料。	電池上方有塊金屬防水蓋，用嚟填密電池同機殼間嘅空隙，減低入水機會。	外置屏幕可顯示時間及短訊，最鬼馬係對應體感，橫置機身時文字都會跟住打橫。

手寫中文畫表情

經過一年嘅發展，中文輸入法在日系手機已相當普及， 今次F-01B更特別啱港人使用，事關佢首創嘅手寫輸入功能，唔單止認到平假名五十音，仲對應埋日文漢字。實測所見命中率頗高，一些多筆畫的字如「繁」、「體」都好快認到，唔會胡亂出怪碼，而且輸入時會有聯想字庫彈出，用法根本與時下中文機冇分別。最好玩係連表情符號都有得畫，例如畫笑臉就會出哈哈笑圖案，比以前要入Menu揀方便得多。唔慣手寫的話，亦可選擇拼音及筆畫輸入法，入簡體中文一樣得。

七彩Keypad會隨時間轉色，來電時會變成走馬燈，好搶眼！	跟機送直立機座，叉電過歌都靠佢。	不但可手寫中文，手機還認到表情符號，例如畫笑臉就出哈哈笑圖案，手機中首見。

3.4吋任篤巨芒

日系手機出名樣靚芒正，F-01B亦唔例外，佢提供黑、白、藍三色，摺疊機身設有鏡面上蓋，後者有個1.4吋單色芒仔，可用來顯示時間及短訊等簡單資料。內置屏幕則有3.4吋，解像度高達480×960，先天輸出比常見的480×854屏幕更為仔細；再加上可向後180度扭芒，配合埋Dolby Mobile內置音效，座枱睇片真係一流。另外，以往很多日系手機要在影相時先可以篤芒，但F-01B就沒有這個限制，廠商更為此開發專用Touch Panel，畀大家可以用手指觸控。

防水美顏攝影

上兩季F-08A扮防水專家，畀用家落水影海底世界。由於口碑載道，今次F-01B繼續支持IPX5/7/8防水及IP5X防塵標準，可以喺常溫1.5米水深下正常操作三十分鐘；就算唔游水，佢都仲可以承受每小時20mm雨量，落大雨都用得着。相比手機下海，影相簡直係Easy Job，首先鏡頭像素升呢到1,220萬，仲有齊28mm廣角、人面對焦、自定場景同ISO 25,600超高感光度等分唇。建議女仔用埋美顏模式，自動幫你執靚皮膚同整假大眼，就算唔戴得大眼Con，影相一樣咁上鏡！

影相介面又清又大，中間對焦框更會自動追蹤被攝者，Model行到邊都唔怕失焦。

美顏模式下Model已經靚爆，影完後仲可以加上圖案，好似影貼紙相咁好玩！

機檔案

制式︰GSM三頻、WCDMA

內置屏幕︰3.4吋1,677萬色TFT，480×960解像度

外置屏幕︰ 1.4吋單色，174×64解像度

鏡頭︰1,220萬像素CMOS

記憶體︰支援microSDHC記憶卡（最高16GB）

對外連接︰藍芽2.0、USB 2.0、7.2Mbps HSDPA

通話時間︰270分鐘（GSM）、

240分鐘（3G）

備用時間︰300小時（GSM）、620小時（3G）

體積︰114×51 × 17.3mm

重量︰141g

查詢︰2374 0618