送完囝囝返學，都會約埋啲同學仔媽咪Tea，不過日日飲奶茶，係咪唔多健康呢？

好彩我識得人多，即刻打電話問吓註冊營養師何智衡。佢話奶茶嘅主要成分係紅茶，但紅茶含有大量單寧酸，令胃裏面嘅蛋白質凝固，對胃黏膜帶嚟唔好嘅影響，亦有臨床實驗證明，鍾意飲濃茶嘅人，胃部黏膜會變薄同萎縮，呢個亦係一般人話奶茶「削胃」嘅原因。至於有啲人以為奶茶加咗奶可以補充鈣質，其實大部分港式奶茶都冇牛奶成分，多數係用含有乳香料同氫化植物油嘅奶精，莫講話唔可以增加鈣質吸收，裏面嘅反式脂肪仲會影響血管健康添！

健康小貼士

‧ 用脫脂奶粉同代糖沖奶茶，既健康又低熱量。

‧ 以熱量計算，奶茶少奶走糖，對健康嘅負面影響會減到最低。

‧ 每日以一杯為限，最好係Tea Time時飲，再食埋複合性碳水化合物嘅食物，好似麥包同五穀類就最好。

‧ 千祈唔好空肚飲大量奶茶或濃茶。

老公要稅！痛！我發現用信用卡稅有免息分期，仲有現金回贈，正喎！

叻太婆仔數：信用卡交稅

好多銀行都有信用卡交稅優惠，好似交通銀行嘅信用卡「現金回贈」計劃，每滿$5,000就可以有$10嘅信用卡現金回贈，最多可以回贈$1,000，仲有長達五十五日嘅免息還款期，至於用中銀信用卡交稅，就可以有長達五十六日嘅免息還款期，仲可以安排長達九十日嘅交稅設定，咁就唔使驚唔記得交稅啦！

網址：

（交通）www.bankcomm.com.hk/tw/index.html

（中銀）www.boci.com.hk/chi/index.php

備註：一切以有關銀行網頁公布為準。

限量版潤唇膏

天氣咁乾燥，囝囝成日玩伸脷，搞到嘴唇乾爭爭！尋日經過萬寧，見到獨家銷售貨Lip Hop限量版英倫熊寶寶潤唇膏，兩者設計都好鬼Cute，加上熊Bear Bear又夠晒得意，相信囝囝唔會再抗拒搽潤唇膏啦！一於同囝囝一人一支，一齊搽吓嘴仔先！

原價$21.9　特價$19.9

查詢：2299 3381

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝