這部由德國Loewe出品，身價高達二十萬有多的52吋LCD TV Reference，放棄傳統膠質外殼，採用Cyber味極重的鋁合金，尊貴格調無以尚之，加上內置500GB硬碟及Wi-Fi傳送功能，錄影及多媒體播放同樣出色，石詠莉（Suki）試睇過後都大讚設計有品味。

最近忙着灌錄個人專輯的Suki閒時最喜歡睇電視，但嫌市面上的LCD TV外形設計太千篇一律，離不開長方外形加個膠質黑框，部部都熟口熟面，所以一睇到這部Loewe Reference就即時雙眼發光。Reference採用冷酷的鋁合金外殼，配合6cm纖薄機身及座地式電視架，擺在客廳中心，流露出一股典雅格調。

透過遙控器便能隨時選擇睇電視或播放相片、音樂及短片等多媒體檔案，獨立發售要賣成$9,800，難怪攞上手分量十足。

機身最厚只得6cm，雖及不上新一代的Edge LED機種，但以52吋LCD TV來講已夠晒纖薄。

聽歌睇片 無線傳送

現時很多人在電腦內儲存了大量短片及音樂檔，可惜電腦螢幕得十多吋，睇不夠一個鐘就已經搞到眼攰頸痛，要轉換格式燒碟拿出客廳睇又太麻煩。有見及此，Loewe就在Reference上引進Wi-Fi無線傳送功能，能將電腦內的多媒體檔案傳送至主機，讓大家在五十二吋超震撼大螢幕上慢慢欣賞，還可以利用由四組40W喇叭組成的音響系統來聽歌，就算是經過壓縮的MP3歌曲，音色都即時靚番晒。

機面設有一個環境光源感應器，會自動調暗螢幕的光度，避免畫面太過刺眼，令用戶睇得更舒服。	備有四組喇叭，支援4×40W輸出功率，人聲對白清晰自然，背景聲效亦層次分明。	進入菜單畫面，就能簡單地選擇透過Wi-Fi轉播電腦上的檔案，或播放儲存在硬碟內的節目。

內置硬碟 方便錄影

近期Suki亦迷上追電視劇，但由於工作關係，未必可以晚晚坐定定喺屋企準時收睇，幸好Reference內置有500GB硬碟，可將心水的電視節目錄影，回家後便可以慢慢睇，Suki仲話：「部機有埋USB插位，方便將朋友抄畀我的相片或多媒體檔案儲存到硬碟內，想幾時睇都咁方便。」同時，這種一體化的設計亦省卻了放置錄影機的地方及接駁上的麻煩，最適合喜歡簡約的發燒影音迷。唯一美中不足是未有內置數碼電視接收功能，要外接機頂盒先睇到高清頻道。

喇叭底下設有一組USB插口，只需插上USB手指或外置硬碟，就能播放相片、音樂及短片等多媒體檔案。

備有兩組HDMI插口，剛好駁齊Blu-ray機及機頂盒。

電動底座 遙控轉向

傳統上，專注外形設計的高級歐洲影音品牌，都不太積極引進新技術，但Reference卻引進近年電視界極流行的200Hz屏幕，透過模擬插播技術令動態畫面更為穩定自然，試播《智能殺機》這類充滿動感的科幻動作電影，都同樣流暢自然，唔會起格。值得一提的是，跟機附送了一個電動座地架，利用遙控器就能作左右35度的轉向，坐在客廳任何位置都睇得咁清晰。

畫質測試：動態場面流暢自然

試播了一段BD版的《智能殺機》，特別揀選了戰機高速飛行的一幕，普通LCD TV播放時可能已經殘影處處，但Reference的200Hz屏幕令畫面保持流暢自然，動感十足。

規格表

螢幕尺寸：52吋

解像度：1,920×1,080

對比度：30,000：1

體積：1,295×1,201×60mm

重量：59kg

查詢：2777 8988