真係唔講唔知，《Avatar》嘅遊戲內容並非跟住同名電影照辦煮碗，而係經過重新編寫，講述電影故事前兩年喺潘朵拉星球上發生嘅事件，據開發公司講，由於遊戲跟電影嘅故事係同時開發，所以連大導演占士金馬倫拍片途中，都不時走去遊戲工作室取經。

遊戲內玩家要扮演人類RDA集團的士兵，在星球上執行任務，但就被迫注射入星球土著Na'Vi的DNA，變身成半人半妖嘅Avatar，開發小組為兩個種族設計咗超過六十款武器，而且各自擁有二十種技能，製作相當認真。

電影大導演占士金馬倫都不時走去遊戲工作室了解開發進度，從中搵新元素放入電影。	有份在遊戲同電影中演出嘅Stephen Lang同薛歌妮韋花，月前都戴住3D眼鏡親身睇遊戲片段。	野狼外形醜陋，但速度快，要瞄準開槍都唔容易。

變身藍血人偷資源

大家在遊戲一開始揀選扮演的角色時，已經可以預覽埋變身成Avatar後的靚仔、靚女樣，呢款由人類混入Na'Vi土著DNA的「藍血人」，外貌同Na'Vi好相似，都係有近三米高。人類製造Avatar出嚟，主要係想利用佢哋混入Na'Vi種族中偷取星球上的資源，Na'Vi族人當然誓死保護，主角就在身不由己的變身中體驗到人性掙扎，最後仲可以揀選自己究竟繼續做人類二五仔，抑或棄暗投明幫番星球土著。

如果彈藥耗盡後，可以走到版圖上的指定地點進行補給。	Avatar雖然武器較原始，但係手長腳長，跳躍能力又強，都幾好用。	變身成Avatar後可以騎乘異獸代步，型過揸直升機同裝甲車嘅人類多多聲。

一套遊戲兩種玩法

最初玩家只能扮演人類士兵，拎住武器在基地附近探索，而遇到的怪獸都唔算太強，只係野狼移動速度快，畀幾隻埋身會有啲危險，好在主角一早就已識得限時隱形或發出電磁波震走身邊怪獸等特技，仲可以駕駛裝甲車、快艇等交通工具，玩法跟一般射擊遊戲差唔多。

遊戲畫面做得相當出色，成功將電影內潘朵拉星球的面貌重現。	最初有十二男、十二女角色任你揀，背後就係變身成Avatar後的「靚樣」。	已設有3D顯示選項，不過一日未出3D電視或電腦芒都係冇用。

但當變身成為Avatar後，情況就好唔同，Na'Vi嘅科技似乎較為落後，所以只能用弓箭或者木棍等「原始」武器，不過勝在變身後手長腳長，跳躍能力大為提升，仲曉得騎乘各類異獸代步，這時候又似在玩動作遊戲，感覺截然不同，可以同時享受到兩種玩法。

有三位電影角色會在遊戲內現身，對故事發展起了關鍵性作用。

人類士兵可乘搭多種交通工具在版圖上穿梭。

明年買電視玩3D

電影以全3D拍攝，遊戲當然一樣得，無論係Xbox 360或PS3版本都已經內置3D顯示輸出功能，不過先決條件係玩家必須擁有3D電視，所以最快都要明年先玩得到。另外，遊戲亦有多人對戰模式，當中就設有五種玩法：Team Deathmatch、Capture the Flag、Capture the Hold、King of the Hill同Final Battle，雖然唔算得好新穎，但勝在可以支援最多十六人網上對打，想幾時做人類士兵又或者Na'Vi族人都得。

機檔案

類　　型： 動作/射擊

開　　發： Ubisoft

平　　台： Xbox 360、PS3

推出日期： 12月3日

售　　價： $329（Xbox 360）

$389（PS3）

查詢：2725 3338