上網買歌通常要逐首計，但係想一次過聽晒成隻碟都幾襟計；改用HSPA上台聽串流音樂直播的話，未計收費高低，淨係離線時冇得聽就夠冇癮！好在剛在香港推出的KKBOX，唔使五十蚊月費就可以連接到有百幾萬隻歌的曲庫，一次過解決晒以上的難題！

在台灣擁有八成網上音樂市場佔有率的KKBOX，由五年前推出服務開始，已累積到超過四百五十萬名會員，仲有接近四百家詞曲錄音公司授權，好多歌手都會利用KKBOX發表新歌。今次來港就一口氣推出支援電腦、iPhone及Android三個平台的線上播放程式，仲得到本地廿五家唱片公司支持，唔使擔心冇廣東歌。

KKBOX將獨家呈獻五月天未出碟的新歌《起來》。

KKBOX跟多家本地唱片公司合作，所以廣東歌庫一推出就已經有好多新歌。

播放清單 隨時同步

KKBOX服務利用了iPhone及Android智能手機支援HSPA功能的特點，能夠在手機直接下載歌曲，或者將線上音樂先加入Playlist，一邊連線一邊聽。由於一個月費已通行電腦、iPhone和Android平台的播放程式，所以用家可隨時互相同步Playlist，變相不用接駁傳輸線或使用iTunes亦能過歌，使用上更靈活方便。

能以中文歌名、歌詞等搜尋歌曲，本地樂迷肯定鍾意。	iPhone及PC版程式可以睇高清MV，內容經常更新，連Eason剛發表的新歌MV亦有得睇。	iPhone及Android版的KKBOX均會顯示專輯及歌曲資料。
播歌介面似足手機的內置播放器。

單一月費 無限下載

通常在音樂網站買歌要逐首計，不過KKBOX的收費有點不同，$49（原價$65）定額月費就可以任用家「單撈」心水靚歌，而且iPhone版及電腦版程式更可以睇埋高清MV，有得聽又有得睇。由於3香港是KKBOX本地的合作夥伴，所以該台的手機或寬頻客戶，就特別享有長達兩個月的試用期，利用手機聽歌及Download更免收額外的本地數據費用，抵玩到極。

動態字幕 好似唱K

其實唔少朋友都鍾意唱K，台灣的KTV更是當地的旅遊點之一，所以KKBOX都加入「唱K」功能，在播放時會顯示出對應的歌詞位置，跟住唱就唔怕入錯Key。另外，KKBOX亦加入了社交功能，可以在Twitter、Facebook等多個平台分享歌曲資料，甚至透過MSN跟其他KKBOX會員即時換歌，比起分享Playlist更好玩。

動態歌詞功能可顯示歌手唱到邊一句，當中又以Android版（右）的介面最似唱K。	動態歌詞功能可以點玩？五月天就在發布會即場示範。	用家可經由Facebook、Twitter，與朋友分享歌曲或歌手資料。唱K。

查詢：3162 3333

網址：http://www.3music.com.hk