街口個煨番薯伯伯終於現身啦！除咗煨番薯，鹽焗雞蛋同鹽焗鵪鶉蛋都係吹住西北風都要食嘅！

之不過咁，老公成日話食呢啲嘢冇益、壞胃，所以我專登搵個Friend─米施洛營養護康中心註冊營養師胡凱恩問吓先！

一條煨番薯（直徑約2吋乘5吋）

熱量（約）：105卡路里

其他營養成分：含豐富維他命A，有助增強免疫力，減輕傷風徵狀。

半碗白飯

熱量（約）：121卡路里

其他營養成分：熱量能保暖，膳食纖維約0.3g，不含維他命A。

鹽焗雞蛋

分量：一隻約50g

膽固醇：212mg

鹽焗鵪鶉蛋

分量：五隻約45g

膽固醇：212mg 380mg

*每人每天所需膽固醇為300mg

叻太話：註冊營養師胡凱恩（我個Friend！）話，其實煨呢種烹調方法冇落油或調味料，總算係健康，而番薯嘅熱量比白飯仲要低，只要係適量進食，實在冇壞喎！至於鹽焗雞蛋同鵪鶉蛋就……即係咁，咁大個人就要自己注意吓啲膽固醇囉，唔好食到失晒理智，總之少食多滋味啦！

天氣涼涼爽爽，最好一家人一齊去海邊吹吹風，欣賞海景，兼睇免費藝術展！

嚟緊嘅星期日有個免費藝術展，展覽地方就喺海邊，仲精選咗一班本地同世界各地藝術家嘅雕塑作品展出，只得一日咋！到時唔止可以欣賞沿海風光，仲可以見識吓呢啲獨特嘅藝術品，一舉兩得！

「香港海邊藝術展」

日期︰11月29日

時間：9:00am至傍晚

地點︰1.2公里之沿海步行走廊，由淺水灣西部泳灘經麗海堤岸路至深水灣東部。

費用：免費

查詢︰www.sculptureonhongkongsea.com

剪藝遮袋任換

近排真係個個商場都有好嘢，好似上水廣場就化身「剪」覽館，展示國際知名嘅紐約剪藝大師Beatrice Coron嘅藝術作品，我上網睇到啲相已經覺得好鬼靚。Beatrice Coron仲設計咗全球限量版環保袋及雨傘，只要响十二月一日至二○一○年一月三日期間喺場內消費購物滿$1,000就可以換環保袋、滿$1,500換雨傘，啱晒我呢啲充滿藝術氣質嘅潮太啦！

查詢：2639 9638

聖誕送禮：分享愛心

聖誕佳節，我打算趁呢個機會同班表弟表妹分享愛心！只要透過樂施會「樂施有禮」網站，以親友嘅名義選購禮物，對方就會收到一張電子心意卡，內附資料講明呢份禮物會點樣幫到貧窮人改善生活；例如將小羊運送到有需要嘅家庭，同埋教佢哋養羊技術。呢個方法送禮物既有新意，又可以幫助有需要嘅人，何樂而不為？

網站：www.oxfamunwrapped.org.hk

溫馨提示：皮革護理

終於可以着吓件皮褸，但之前擺喺衣櫃咁耐，着上身前記得清潔一下。如果皮褸上有輕微污漬，可以清水輕輕抹除，然後用乾布擦乾。至於較嚴重嘅污漬，可將半杯中性清潔劑加入一公斤清水中，浸濕抹布然後擰乾，擦走污漬，之後即刻用一塊乾布擦走清洗液就OK啦！

煨番薯─好靚嘅煨番薯─恨咗成個夏天，終於有得食囉！

天生精打細算，以照顧好一家大小健康為己任。

叻太起底

年齡：30以上40未滿

職業：全職家庭主婦

家庭狀況：家有老公及4歲囝囝