天水圍飛馬今季頻頻大炒對手，原來佢哋俱樂部收埋兩台PS3做秘密武器，閒時會一大班人操《Winning》切磋球技。適逢今日係《Winning Eleven 2010》開賣日，一於找來兩位飛馬新星李靈峰和張健峰，率先試玩這隻壓軸大作，未開波已經爭崩頭！

早前出咗Demo和歐版嘅《Winning Eleven 2010》，網友讚佢Online順、畫面靚到痹，連電腦AI都大幅提升，依家終於等到港版登場，發覺動作走位比以前更流暢，仲可以玩埋即場戰術和球隊管理，名副其實做到實況足球。

費托靚到暈 主場夠氣氛

記得上集《Winning》經已係美斯擔正，今次搵埋王子費蘭度托利斯做雙封面，特登用真人做過晒盤扭動作和特技表情，每當慢鏡重播（Replay）時，直頭好似睇緊現場咁真實，Zoom埋去連鬚根都見到。而且電腦沿用Teamvision 2.0智能系統，除咗球員走位和龍門操控比上集醒目外，球證亦唔會再吹黑哨，最正係球迷反應變得更激，客隊一掂到波就會噓聲四起，主隊入波又識得叫多兩錢肉緊，盡情發揮主場威力。

球員的面部設計相當仔細，Zoom埋去連鬚根皺紋都一覽無遺。	戰術運用相當重要，設定合適支援距離和補位才是致勝之道。	特登搵真人做過晒盤扭動作，令操作變得更加細膩。

模擬搞球會 自建港足聯

唔好以為今集淨係靚咗同醒咗，實際在單人模式「Become a Legend」和「Master League」內均各自加入新元素。前者將扮演一名球員，進行單對單攻防或呼喚隊友協助，努力爭取表現成為球隊傳奇；後者則作為領隊兼老闆，負責買賣和訓練球員、控制成本開支，甚至要搞廣告贊助和球迷會等。記得上集就有粉絲將香港甲組球隊波衫和球迷打氣聲入晒落《Winning》，今次一於搞番個港足聯，想必會玩得更加投入。

天水圍飛馬有不少粉絲，這位髮型有點似「港版亨利」鄭少偉。

唔少得本地班霸南華的球衣，驟眼睇有幾分似港隊前鋒陳肇麒。

買新衫撐港隊

今代《Winning》好玩就好玩喇，不過對本地球迷嚟講，始終有啲遺憾，因為仲未有香港隊玩，尤其是今個月十八號我哋主場對日本打亞洲盃外圍賽，唔可以提早煲Game當預演。不過唔緊要，撐港隊仲有好多方法，好似全新嘅港隊主客波衫，就喺聽日於Futbol Trend及adidas旗艦店開售，一於買定新衫，延續上個月南華對科威特SC嘅「香港足球不死」精神，到時齊齊着住入場幫港隊打氣！

香港隊作客球衣　$399（b）

香港隊主場球衣　$399（b）

《Winning Eleven 2010》

開發商：Konami

平　台：PS3/Xbox 360

類　型：足球運動

人數：多人連線

日期：已推出

售價：$388（a）

查詢：（a）2246 8113、 （b） 2317 1686／2730 0157