街機版《鐵拳6》都出咗成年，即將推出嘅家用版落齊《鐵拳6》同改版共四十個角色，亦搵埋幾位在日本漫畫界好有分量嘅漫畫家，幫多個主要角色設計新衫，不過最特別都係加咗個以立體動作形式出現嘅故事模式，可以同埋朋友控制唔同角色邊行邊打，執錢升呢！
名師設計新衫
今趟《鐵拳6》請嚟多位星級漫畫家幫角色畫新衫，好似由CLAMP（Tsubasa翼）幫風間仁設計咗套白色禮服、永野護（五星物語）就為Anna設計斑馬裝以及風間飛鳥做咗套黃色戰衣、而岸本齊史（Naruto）就幫Lars轉咗個紅色長衫Look。嫌唔夠特別，玩家仲可以親自操刀，為角色設計髮型、外表、配件同紋身，「原創」角色仲可以拎上Xbox Live同其他玩家互揪。
兩招反敗為勝
《鐵拳6》今次終於加番個「憤怒」系統，即係當體力剩低好少時，角色就會發狂增加攻擊力，令處於劣勢嘅玩家都有機會反敗為勝。至於另一個較特別嘅招式係「反彈連段」，當對手在半空時，玩家使出具反彈屬性的招式攻擊對手，擊中的話佢就會跌落地面再彈起，之後仲可以繼續駁連招狂打，中咗真係隨時KO。
新增動作模式
之前好多格鬥遊戲嘅故事模式，都係用番格鬥玩法再加幾段CG短片湊合而成，但係今次就改為動作形式。玩家可以在地圖上行來行去，進入不同的關卡打嘍囉同打大佬，仲可以執起地面上嘅武器，好似機關槍、狼牙棒、火燄槍等，有時仲要破壞背景上的物件先開到隱藏地圖，真係幾有趣。除咗可以單打外，故事模式亦支援二人合力應戰，打完每一關都可以賺錢買裝備升呢，非常襟玩！
文/攝（部分）：Brian
機檔案
類型：格鬥
開發：Namco Bandai Games
平台：Xbox 360
推出日期：10月27日
售價：$339
查詢：2418 8896