德甲球隊禾夫斯堡（Wolfsburg）去年勇奪球會首個聯賽冠軍後聲名大噪，也造就了當地的旅遊業。球迷不妨Plan個自駕睇波團，喺法蘭克福（Frankfurt）租車開往三百七十公里外的禾夫斯堡主場館Volkswagen Arena，現場感受主場威力，順便過隔籬佔地達四十萬平方公尺的Autostadt（汽車城），一次過睇晒VW集團旗下汽車，爽過跟團去Shopping！

近年港人興起自駕遊這玩意，設有無限速公路的德國，當然是熱門之地。租車在當地相當盛行，大部分的機場都有租車公司櫃枱，而且費用不算貴。筆者早前於Weekday租用Volkswagen Passat CC 2.0T四十八小時，連保險、稅項等費用，只是四百歐元左右，只要取車前跟租車公司講明還車地點，基本上可以揸到邊、還到邊！由法蘭克福前往禾夫斯堡約三百七十公里，只要在導航系統輸入「Volkswagen Arena」（38446, Wolfsburg）便可，沿途會經過A5及A7等高速公路，大部分路段更不設車速限制，包你過足癮！

留意燈號　綠燈咪畀油

Passat CC 2.0T結合了豪華、動感的元素，200bhp馬力配合DSG波箱及DCC（主動式底盤控制）系統，加速快而穩定，0-100km/h僅需7.6秒。於Sport模式之下，以210km/h在Autobahn飛馳仍相當安穩，半點「飄」的感覺也沒有。不過，德國的交通燈設計與香港不同，甚至出現汽車交通燈與行人過路燈同時亮起綠燈的情況，進入市區後要打醒十二分精神，千祈咪以為綠燈就可以大模廝樣畀油行，分分鐘會釀成意外o架！緊記，行人有優先過路權，唔好胡亂響「Horn」砵人。

TSI引擎有好力省油的特點，曾獲得不少國際性獎項。	車廂布局豪華而富動感，後生仔都同樣啱揸。	於公路上合法地以210km/h飛馳，邊個車迷唔想？
沿途的高樓大廈不多，衞星定位非常準確。	波箱旁設有DCC選擇按鍵，Sport模式可提升高速行車的穩定性。

錶位足夠　收費不定

Autostadt與市中心距離只有數公里，出去搵食醫肚，只需五至十五分鐘車程，而且大部分街道設有錶位，不愁冇位泊車，收費就視乎地區而定，最貴也不會超過1歐元/15分鐘。由於禾夫斯堡非旅遊熱點，市內的地道餐廳只提供德文餐牌，侍應生的英語水平也相當有限，點菜有一點困難。另一方面，禾夫斯堡主球場—Volkswagen Arena就在Autostadt的毗鄰，睇完波行過去睇車，只需十分鐘。值得一提是禾夫斯堡的訓練場就在主場館旁邊，就算當日冇比賽，都有機會睇到球隊練波，話唔定可拎到迪施高、加菲迪呢對一黑一白嘅前鋒拍檔簽名呀！

咪錶只收硬幣，遊客記緊多帶零錢。

購買泊車票後，必須放在擋風玻璃下以資識別。

車檔案

車　　型：四門四座位轎跑車

引　　擎：TSI

容　　積：1,984c.c.

最大馬力：200bhp/5,100-6,000rpm

最大扭力：28.6kgm/1,700-5,000rpm

驅　　動：前置引擎、前輪驅動

傳　　動：六前速DSG

制　　動：（前/後）通風碟

查　　詢：3698 9688