提到國產手機，難免與山寨廠畫上等號，潮男潮女很少考慮。不過自從去年內地引進Sharp這個手機品牌後，日本機終於徹底漢化，好似最新SH6110C便可直讀繁簡體中文，兼有齊六色至潮外殼，潮味十足！每次提到日系手機，鑊氣特別多，唔單止要用Hyper SIM改機，最慘係訊號接收唔穩定，搞到好多人買唔夠一個月就賣機！不過去年底Sharp終於進軍祖國手機市場，介面直接改成中文，雖然由水路來港後價錢炒高晒，但穩定性就毋庸置疑，當買個安心都值得。

搶爆十五色系

日系機至叻玩款，外置閃燈、Bling Bling機殼咩都玩過，去年走中價路線嘅PANTONE 812SH更玩足二十四色，當中橙色版就曾被炒至四千多港元的高位。SH6110C正正是由812SH改良而來，雖然顏色減至十五種，但仍有黃、橙、青、粉紫、粉紅及螢光綠等顏色可選，搶眼度絕對唔輸蝕！外形方面，直頭係812SH的倒模，機面採用了鏡面鋼琴烤漆，並搭配0.8吋OLED外屏幕，可顯示來電或訊息，平時就會隱藏在銀色鏡面底下，夠晒神秘簡約。

鍵盤回彈力適中，並印有筆畫符號，跟本地行貨一樣。	雖然由812SH變種而來，但鏡頭已作小升級，由二百萬像素升呢至三百二十萬像素。	對應8GB microSD卡，卡槽設於機側，方便更換。

2G接收更穩定

功能方面，基本如影相、拍片、FM收音機及記憶插卡等全部有齊，不過日系機常見的電視天線，祖國化後反而取消了。另外，國內盛行的雙卡雙待功能，SH6110C亦欠奉，全機只有一個SIM卡槽；而且僅僅支援2G制式，網絡下載速度自然冇3G咁快。但話分兩頭，以往日系機即使用上Hyper SIM，遇着3G台時亦經常接收不穩，特別是「衫仔」台更一定潛水，如今只行2G，穩定性反而更好。

耳筒介面為不常用的2.5mm，隨盒又沒有轉插，美中不足。	左邊嗰張就係Hyper SIM，以往日系機都要插住來用，更換另一張SIM卡就好大機會用唔番，如今SH6110C唔使用，一天光晒！	跟機送入耳式耳筒及兩腳插座。

內置流動版QQ

以往玩日系機都被視作潮人，但其實有苦自己知，例如純日文介面操作時要估估吓，大部分多媒體功能又被鎖死，就算聽歌都要將格式轉成AAC，簡直煩到爆！今次推出中文版，唔單止倍覺親切，仲有個全中文介面，雖然只有簡體，但可直讀繁體SMS及歌名，保證唔會出現怪碼；最重要是設有拼音及筆畫兩種中文輸入法，港人用慣唔難上手。程式方面，日系機常見的i-mode當然被抽走，但就預載了內地網民至愛的流動版QQ，登入帳戶就可使用，識國內朋友話咁易！

輸入法唔算多，只有拼音及筆畫兩種，但都是港人用慣，問題不大。	預載了流動版《QQ2008》，省卻下載及安裝的時間。	內置的音樂播放器終於可以直讀MP3，毋須為轉檔而煩惱。

比歐韓手機吸引

雖然比起最新出的純日系手機，SH6110C個款有點落伍，但有齊十五種顏色，兼提供繁簡體中文顯示及輸入，未玩過日系機的朋友可以一試。最重要是價錢不過二千元左右，以入門機來說，點都比見慣見熟的歐韓手機吸引得多！

影相介面跟日系機一樣咁簡約，只是2.4吋屏幕下的圖示太細，看得較辛苦。	外置屏幕只有0.8吋，好低調，但用來顯示時間及短訊就剛剛好。	率先來港有六種顏色，分別是橙、黃、青、粉紫、粉紅及螢光綠，全部都咁搶眼！$2,180 /各

機檔案

屏　　幕︰2.4吋26萬色ASV，240×320解像度

鏡　　頭︰320萬像素自動對焦

記　憶　體︰內置23MB，支援microSD記憶卡（最高8GB）

對外連接︰藍芽2.0、USB 2.0、EDGE

通話時間︰180分鐘

備用時間︰310小時

體　　積︰49×97×17.6mm

重　　量︰107g

查詢︰2396 6380