去東京遊戲展（TGS）可以預覽來季有乜必玩勁Game，除了PlayStation和Xbox鬥餐飽之外，各大遊戲商都施展渾身解數，當中最正肯定要數Konami的《Winning Eleven 2010》擂台陣，擺定十幾部機畀人挑機，仲有大批Game Girl陪你玩，就等今日TGS閉幕總結一下遊戲展中之最。
特派記者：Jeff
全球經歷金融海嘯，唔少廠商都縮減預算，好似過往會獨立提前搞發布的任天堂，今年就連影都冇，好彩現場多了不少生力軍參展，好似首度來TGS擺檔的Ubisoft、新增的精品售賣區等，連台場1:1高達頭都搬埋過來，唔講仲以為去錯咗旅遊景點！
最重火藥味《Winning Eleven 2010》
《Winning Eleven 2010》找來美斯和費蘭度托里斯做雙封面，唔講都知道兩大球壇新貴有得鬥，身為利記粉絲的筆者，梗係用「王子」扭番兩腳，點知即場有個鬼佬用巴塞三箭頭屈機，搞到唔少參觀者都即時挑機圍揪，要讚今集球員AI和動作表情都有明顯進步，中場和後衞合作得更好，想入波都唔係咁易。
最新參展商《Assassin's Creed Ⅱ》
Ubisoft首次來TGS參展，主打當然是快將推出的《Assassin's Creed II》，上集被玩家話NPC勁廢，躲在角落實唔會被發現，今集開發商講到明「無一處地方係安全」，看來玩家想扮刺客就要先下手為強，並可僱用盜賊、信徒和僱傭兵協助過關，加入不少新元素。
最令人懷念《鐵拳高達》
Namco Bandai設計的遊戲向來最受動漫迷歡迎，適逢高達三十周年，特別拆個1:1高達頭供人拍照留念，不過最多人試玩的卻是十月將推出的《鐵拳6》，這款由街機移植的經典作品，除了連線對戰外，更加入動作故事模式，邊行邊打敵人，娛樂性更高。
最估佢唔到 Docomo手機遊戲
別以為TGS淨係得遊戲商參展，日本手機界大哥NTT Docomo亦擺設大型攤位，以手機為主題畀人任玩數十款下載遊戲，最估佢唔到係連國民級《DragonQuest Ⅲ》、《高達》對戰射擊遊戲都有齊，可惜淨係日本網絡先玩到，香港用家都係玩住iPhone、Android先啦。
最搶錢攤位 Capcom精品
如果講最有Heart的展區設計，應該非Capcom莫屬，玩《Lost Planet 2》連線對戰時，成個區布置成異域星球，而玩《Biohazard：The Darkside Chronicles》就改在黑房內進行，等隻喪屍失驚無神嚇鬼你。另一邊廂開埋舖頭賣《芒亨》、《街霸》等精品，普通一件Tee都要五、六千日圓，唔單止搶客，仲搶錢。
