26/09/2009

播放本新聞相關短片

體感Project Natal打機唔用手掣

明年遊戲界應該會有翻天覆地嘅變化,例如會出3DGame同Motion Controller,但係論震撼應該比唔上Project Natal,連遙控器都唔使用即玩到3D體感遊戲,似足科幻片。今年Microsoft在東京遊戲展(Tokyo Game Show)中,就突然搞咗個Project Natal Lab,而且仲要係VIP先有機會入去玩一陣,夠晒神秘!

想入去Project Natal Lab玩,當然要多得有關方面的幫助,如果唔係就同普2參觀者一樣,只能透過外面極幼的條狀綠色玻璃𥄫人哋玩,小記有幸親身落場試玩後,發覺原來都唔係咁容易控制!

手忙腳亂全身郁

今次試玩的Project Natal同今年E3公布時的遊戲差不多,第一個小遊戲就係要用身體各部分擋波,第二部分就係試揸隱形軚盤賽車,而且只要將右腳踏前就能加速,踏後就煞車,神奇到不得了。筆者玩慣手指操控,一下子要全身郁去打機都唔係幾慣,玩落都幾攰;不過由於Project Natal Lab密室內唔畀影相,所以影唔到玩家玩到手忙腳亂的情況。至於大家最關心係有邊啲廠商會在新平台推出遊戲?包括Capcom、Sega、Konami、Square Enix、EA、Ubisoft等十六間大廠都表明會支援,希望快啲有真遊戲同大家見面就最好喇!

Xbox360新作預告

雖然唔係人人有機會玩到Project Natal Lab內嘅遊戲,不過參觀者只要畀少少耐性排隊,一樣可以喺會場內試玩到多款Xbox360上的大作,依家就一齊睇吓有幾好玩!

《N3》續篇《N3 II》(《Ninety-Nine Nights 2》)仍然係Xbox 360獨佔遊戲,既保留上集勁受歡迎嘅爽快千人斬系統,幾多怪物同時出場都唔窒外,現場所見的試玩版仲有一段約十分鐘的岩洞版圖,部分怪物更識得懸浮半空或放毒,不過好在主角有極多必殺技可用,最多可以打到上千Hit。

《Forza Motorsport 3》三芒車震

推出日期:十月二十日

《Forza Motorsport 3》下個月就推出,Microsoft都幾落本錢宣傳呢隻「GT Killer」遊戲,現場既設有幾台配備三個屏幕的駕駛室,仲有一台底座識得震嘅真實駕駛室,炒車、撞壆震到心都離晒,效果幾正!現場試玩完仲有《Forza 3》貼紙送添!

《Bayonetta》女版《DMC》

推出日期:待定

《Bayonetta》係由有份製作《Devil May Cry》嘅製作人神谷英樹設計,所以遊戲嘅整體感覺都幾有《DMC》Feel!遊戲女主角是跟遊戲同名嘅Bayonetta,以魔女身份打敗天使大軍,當然唔少得大量華麗招式搭夠,難怪係場內數一數二多人排隊試玩嘅新Game 。

《Front Mission Evolved》轉玩FPS

推出日期:待定

以往《Front Mission》系列都係玩戰略模擬,今集《Front Mission Evolved》轉玩大熱嘅射擊(FPS)模式,玩家要親身控制裝甲機械人打仗。不過遊戲都算有啲新意,除有大量武器可供使用外,亦可以為機體更換零件,提升戰鬥力,應該可以吸納到一班新Fans。

Brian