Sony出完輕薄版PS3又出PSPgo，唔講都知佢下半年發力搶攻遊戲巿場，不過好機都要配勁Game先夠爽，適逢全球最大電玩展之一的Tokyo Game Show昨天正式揭幕，就等我哋一連三日直闖日本遊戲王國，搶先試玩年底推出的《GT5》、《FF XIII》等大作，睇吓有幾好玩！
今年TGS2009遊戲展主題「Game, It's so energetic!」，開幕請來Sony Computer Entertainment（SCE）首腦平井一夫講來年大計，現場攤位仲有Square-Enix、SEGA、Konami、Capcom等大廠支持，看來係時候買定新PS3和PSPgo。
《Gran Turismo 5》過千款名車
提起經典賽車遊戲相信各位會諗起《Gran Turismo》，早前在PS3就出過Prologue版，不過講到車款和完成度，又怎及真正嘅《Gran Turismo 5》呢。除了備有近千架跑車、八十條賽道和十六人連線模式外，現場仲擺埋賽車椅、波棍和軚盤，真實感超強，揸住架Benz SLS AMG落場玩番幾轉，刮花都唔會心痛。
推出日期：○一年初
《Metal Gear Solid：Peace Walker》小組救隊友
《Metal Gear Solid》由以往單人匹馬潛入敵陣，到今集《Peace Walker》玩小組行動，指揮複製蛇叔（Snake）完成任務，仲可以拯救隊友、分享物品和變紙箱偽裝等，夾埋PSPgo四人連線一定更好玩。
推出日期：二○一○年
《Final Fantasy XIII》玩連鎖出招
將於十二月喺PS3上推出嘅《Final Fantasy XIII》，一直只得Trailer唔畀試玩，今年遊戲展終於有Demo玩個夠，畫質靚咗、3D戰鬥場景不在話下，最正是今集改回實時戰鬥Active Time Battle系統，利用時間計鬥快出招，還可與同伴組成連鎖攻擊增加殺傷力，而試玩版主角暫時可召喚奧汀，相信遊戲往後會有更多熟悉的召喚獸出現。
推出日期：○九年底
《如龍4》 擸架生開拖
現實中做唔到日本柏青哥或古惑仔，在《如龍4》都可一嘗人在江湖身不由己的感覺，記得SEGA上集找來女優真人演繹遊戲角色，今集除了新女優和日本街景外，連主角打「爛仔交」都有所改良，特定時間按掣可出鎖頸、踏臉等陰招，又可耍雙節棍、長棍，甚至執雜物攻擊敵人。
推出日期：一○年內
新漫畫隨時下載
香港不少人拎部PSP睇埋電子書和影片，十二月在PlayStation Store率先引入漫畫下載服務，以後出街有部PSP就可Wi-Fi睇新漫畫，放大後畫質都唔錯架。
推出日期：○九年底（日本限定）
Tokyo Game Show 2009資料
日 期：二○○九年九月二十四至二十七日（星期四至日）
地 點：日本千葉幕張展覽館
入場人數：預計超過二十萬