PSP出咗五年，由《Winning》、《無雙》到《芒亨》，陪伴我們度過不少時光，最經典莫過於聚集了大批Game迷，晚晚圍在麥記Wi-Fi對戰，為壯大這股網絡潮流，新一代PSPgo改用網絡下載遊戲玩法，但究竟唔用碟點樣玩遊戲？轉做推芒後手感又如何？在首賣前先逐一解開PSPgo謎團。

早排網上流言滿天飛，PSPgo未發布已有大批網相流出，人人以為新機改用M2記憶卡就可玩ISO，點知玩上手先發覺遊戲需經過PlayStation Store網絡下載，好似同日推出的《Gran Turismo》大作就備有下載版供新機使用，並加建「Minus」電子遊戲庫，有過百隻Game畀你網上慢慢揀。

利用USB連接電腦，便可經《Media Go》軟件管理遊戲和多媒體檔案。	以後唔使到Game舖買碟，到PlayStation Store便可以信用卡或增值卡下載遊戲。	PSPgo（左）比舊版PSP細近三分之一，備有3.8吋1,677萬色靚芒。

謎團1 PSPgo改良推芒操控？

由原祖PSP-1000到輕薄PSP-3000，歷代操控都沒太大改變，直至PSPgo玩推芒設計，手掣移回畫面下方，玩開舊PSP的筆者起初真係唔多慣，相信此設計是迎合愛纖巧的女士要求。而入到遊戲發後會現新舊Game均可對應PSPgo，只係用唔番UMD光碟，要經PlayStation Store重新下載。

OS升級至5.7版本，合上屏幕會顯示時間，按L/R則會轉成月曆。	PSPgo主打Wi-Fi和藍芽，方便連接PS Network之餘，一樣可同朋友Ad Hoc對戰。	基本操控沒太大分別，下載埋同日推出的《Gran Turismo》就更加爽。

謎團2 唔用UMD光碟玩下載？

唔使Load碟的好處是玩遊戲更加流暢，但就有機會儲爆記憶卡，以PSPgo內置16GB容量計算，大約夠帶十幾隻遊戲出街玩，因此新機附送USB線連接電腦，透過《Media Go》軟件管理遊戲及多媒體檔案，更可經電腦連線到PlayStation Store選購遊戲過落PSPgo，就算部腦唔小心壞咗都有五次下載配額，令網上買Game倍覺安心。

玩慣舊PSP的話可能覺得推出來的十字掣冇咁就手，加殼改掣都有難度。	SCEH總經理項明生（右三）表示PSPgo十．一在香港全球首賣，相信會吸引內地遊客搶購。	專為新機而設的一系列配件：護架（售價：$172）色差線（售價：$178）In-Ear耳機（售價：$88）

謎團3 升級硬件及OS介面？

對比舊版PSP，新機細了接近三分一，放落褲袋同部iPhone差唔多，雖然LCD芒由4.3吋改為3.8吋，但仍保留一千六百七十七萬色畫質，比對手靚得多。而OS則升級至5.7版本，合上屏幕時會顯示時間和月曆，仲可記低重要日子及時間提醒用家，相當User-friendly。

謎團4 新系列配件玩藍芽？

由於機身設計和插頭都唔同晒，PSPgo特別設計咗一系列新配件，由保護套、插座到色差線等供玩家選購，最正是新機支援藍芽功能，除了可對應藍芽耳機作Skype通話，更可無線連接PS3手掣，返到屋企將PSPgo以USB線接駁PS3便能認出無線手掣，打機自然更就手。

全球第一．PSPgo首賣日

日期：二○○九年十月一日

時間：凌晨十二時開始

地點：尖沙咀海港城海運大廈二階多功能運動場SportX

名額：三百名（每人限買一套）

十．一首賣有着數

PSPgo將於十月一日在香港搞全球首賣，首三百名買家可額外獲贈PSPgo紀念編碼證書、$200電子增值卡、限量版Tee、原廠配件和頸繩套裝等紀念禮盒，計落都值幾舊水。各位舊PSP玩家，不妨等多些電子遊戲推出才考慮換機；若仍未擁有PSP的話，就趁住首賣優惠掃部！

查詢：2341 2356