時下女生恨做Model，仲個個都想學諸葛、Baby同Chrissie進軍日本，就連小可愛Liz都話要去日本行番轉天橋先至不枉此生！佢仲諗到條絕世好橋，話要用美食去俘虜各大經理人公司巨頭咁話喎！計我話，你冧經理人之前，不如睇吓冧唔冧得掂隻天婦羅蝦先啦！

近排打開報紙，不時見到香港o靚模代表出戰日本時裝界的消息，連小記都睇到心郁郁，想去日本行番轉，更何況正值花樣年華的模特兒Liz呢？「最初決定做Model時，都有不少Agency想簽我，但最後我揀了現在的經理人公司，因為佢哋幫我Plan好晒去日本發展嘅路！早排我就曾經去過日本Casting，希望好快可以登陸日本啦！」

識諗 有運行

看Liz一臉自信的樣子，真的佩服年輕人那份一鼓作氣的信心。Liz還說她曾經學煮日本菜，好讓到日本時，可為新朋友煮番兩味交流一下，話唔埋到時還可靠一手好廚藝，俘虜個日本型男添！Liz咁識諗，抵你有運行！之不過今次在八幡師傅面前炸天婦羅就大出洋相。

Liz自食其果後感：「真係上得太多脆漿添！搞到好熱氣又成口粉！」	Ichiban!	八幡師傅

脆漿 要即溝

八幡師傅表示，天婦羅嘅食譜超簡單，但係就絕對是易學難精，首先必備四大元素：新鮮材料、優質芝麻油、恰當的脆漿比例，以及適當炸油溫度。日本稱為「海老天婦羅」的炸蝦，是最受歡迎的款式之一，當中尤以長約四吋的海蝦最適合入饌，而調校脆漿所用的小麥粉，平日則可在日式超市裏買到。但要注意天婦羅脆漿不能一次過調校太多備用，必須即調即用，才不致因存放太久而變得黏稠，令炸起的天婦羅脆漿過厚，食到「成口粉」。另外，八幡師傅更額外附送一個貼士：蝦隻洗淨去殼後最好先界幾刀，炸後就不會蜷縮，Liz好明顯唔識呢招，否則她的製成品就唔會變鬈弓蝦米。

對筷子咁粗o架？點用喎！	因乜事你成隻蝦浸晒落兜漿度呀？	沿着油鑊邊落蝦，此舉大錯特錯！
錯晒！	啲油好彈咩？借件避彈衣過你好唔好？	點解鬈咗嘅？ 哈！笑死我啦，蝦身唔界幾刀，梗鬈啦！
Liz的完成品只值五十分，師傅仲話分數係畀材料分咋！ 50分！ 咦……唔制呀！

材料：

蛋黃水

冰水

小麥粉

海蝦6隻

做法：

1.蛋黃水、冰水及小麥粉按1:1:1比例加入盤中，調校成天婦羅脆漿。

2.海蝦洗淨剝殼後，蘸上脆漿。

3.芝麻油預熱至攝氏一百八十度，將海蝦放進油中，待炸至金黃色即成。

師傅正確示範

天婦羅要做得靚，八幡師傅稱，一字記之曰「快」！所有程序都要快手做完，而且炸起後要即時趁新鮮食用，咁就為之Very Good啦！

調好脆漿後，可以用筷子將脆漿彈到油中，以測試油溫，若脆漿即時浮在油面，即代表油溫適合。	脆漿不用太多，只需將蝦身蘸數下便成。	千萬不要沿油鑊邊落鑊，必須快手將蝦輕拋到油鑊中，令蝦各部分均勻受熱，同時亦可「Fing」走多餘的脆漿。
炸起後，略為瀝乾油分，便可上碟，建議即食為佳。

今期師傅：八幡康弘

曾於稻菊日本餐廳集團及旗下餐廳工作逾十年，現為帝苑酒店稻菊日本餐廳天婦羅大廚，最擅長炮製天婦羅蝦、蔬菜及蝦餅。表面睇惡形惡相，但笑起上嚟好似肥姐。

Liz's Profile

中文名黃若瑜，十七歲新進模特兒，古銅肌膚充滿陽光氣息，曾拍攝康和堂、珠海書院等平面廣告。