早前「星牌」油店話本港嘅燃油零售價受到入口價格、營運成本及市場競爭等多方面影響，仲話已經同入口價格走勢相若咁話。不過，依家嘅國際油價已跌至○六年嘅水平，但香港嘅汽油、柴油零售價比當年升咗一成至兩成半，莫非營運成本真係增加咗咁多？事實上，小市民根本就唔會知道油公司點樣釐定燃油零售價，只希望政府可以「的」起心肝，成立燃油監管部門，並訂立油價加減機制，防止油公司利用「加快減慢」嘅營銷手法，令大家每日都要捱貴油。
