跟你認識多年，一直對你又羨又妒，身邊女孩子都愛死你。雖然你每次出現都是圓蛋面龐跟粉紅色蝴蝶結，面上又沒有嘴巴，但三十五年來，由少女到中女都對你又攬又錫。最近你更與SE聯手推出紀念版手機W395，女朋友黐你多過黐我，只能嘆句︰「做隻貓，不做情人……」。

今年是Hello Kitty三十五歲生日，雖然離正日還有兩個多月，但坊間已不停見到各式的周年紀念品，四處都有芳蹤。SE與Sanrio合作多年，早為吉蒂貓出過手機鏈、Clutch Bag同震震咕o臣，最近終於輪到全港首部Hello Kitty手機W395登場。

正面經過了金屬烤漆處理，望落已經好Elegant，加埋粉紅色塗裝，女士們怎能抗拒﹖$1,380

背面印滿了蝴蝶結拉花，好Kawaii！

內置貓樣 螢幕主題

SE W395於今年三月推出，雖然有香檳金及薄暮灰兩款顏色，但由於規格入門，並未引起太大回響。今次換上Hello Kitty新衣，話題性返晒嚟！外形上，它沿用圓潤的推蓋設計，重量不足100g，單是這點已很適合女生使用。最可愛是全機換上了粉紅色主調，背面印上吉蒂貓「嘜頭」及大大小小的蝴蝶結裝飾，Kitty迷不用再找貼紙了。嫌未夠Cutie，機內還內置了Hello Kitty螢幕主題，並可上網下載專用Wallpaper，Fans們應該感到滿意了吧！

原本已有五款主題，今次追加了Hello Kitty主題及牆紙。

換上Hello Kitty主題後，功能介面的指標會變成蝴蝶結（紅圈），圖案彈吓彈吓，好過癮！

播歌介面 一按即開

作為一款Walkman手機，它的音樂功能亦有番咁上下，不但內建了RDS FM收音機，也具備完整的Walkman音樂播放器。機面更設有音樂快捷鍵，一按即打開播歌介面，毋須逐層Menu入咁麻煩！播歌時音樂從兩邊立體聲喇叭發出，聲音不會偏埋一邊，而且中低音處理不俗，用戶亦可換上跟機的HPM-64立體聲耳筒保持私隱，但要留意手機並冇Hello Kitty主題鈴聲，要自行轉換MP3或AAC檔案，美中不足！

原以為耳筒也會換成Kitty樣，但跟機的仍是舊款HPM-64，有點失望。	除了機內的Hello Kitty主題，Fans還可到SE網站下載Kitty Lab手機牆紙及屏幕保護程式，費用全免。(網址︰http://www.sony ericsson.com.hk/kittylab)	冇Hello Kitty小遊戲，但內置的Guitar Rock Tour玩法好似捽碟機，夠你玩餐飽。

影相方便 至啱Snapshot

手機的其他規格唔算太有特色，例如屏幕解析度僅為176×220像素，大小也只得兩吋，制式亦只有GSM/EDGE四頻，用唔到3G有點落後於大市。另外它內建二百萬像素鏡頭，卻不支援自動對焦，教人意外，但基本功能如白平衡、連拍、相片特效、夜景模式佢都有齊，也提供簡單的相片修飾及編輯功能，用起來算是方便，至啱女仔Snapshot。最後，它提供世界時間、單位換算等小工具，並內置Guitar Rock Tour及Cafe Sudoku等多款遊戲，嫌唔夠還可到PlayNow下載Java程式或遊戲，Kill Time一流！

二百萬像素鏡頭較失色，反而兩排喇叭孔就非常搶眼，中低音處理不俗。	快門掣過於扁平，指甲長會按得好辛苦。	10MB內置記憶體一定唔夠用，所以隨機附送1GB M2記憶卡補番數。
影相時可用方向鍵切換相片瀏覽、拍照及錄影三個模式，簡單易用，女生至Buy。

機檔案

制　　式︰GSM四頻

屏　　幕︰2吋26萬色TFT，176×220解像度

鏡　　頭︰200萬像素2.5倍數碼變焦

記　憶　體︰內置10MB、支援M2記憶卡

對外連接︰藍芽2.0、USB 2.0、GPRS、EDGE

通話時間︰8小時

備用時間︰480小時

體　　積︰96×47×14.9mm

重　　量︰96g

播歌較滿意

女仔揀手機通常都重視外觀多過功能，W395規格雖然唔算強，只有播歌一環較令人滿意，但搭上Hello Kitty後卻夠晒Gimmick；最重要是換裝後售價不變，千多元便有愛貓長伴左右，身為粉絲冇理由唔支持。

查詢︰8203 8863