人人講環保，行動先至最實際，混能汽車（Hybrid）就算得上係現時成熟度最高、市場最普及嘅環保車款。早前筆者為豐田（Toyota）嘅Prius作長期測試，四日行咗六百幾公里，估吓油費係幾多？只係$0.66/km咋！

至今Pruis已經推出到第三代，車系全球累積銷量三十萬部，第三代Pruis標榜耗油更低、但係動力更強。筆者呢四日就揸住新Pruis多次來回大埔至將軍澳之間，走過吐露港公路，亦行過西貢公路及大帽山一帶，仲去過旺角，總共走咗六百六十公里，交車畀代理前先行入油，盛惠$400，以截稿前油價計算，即係每公里$0.66，同廠方公布嘅$0.56唔係差好多，但係同級汽油引擎私家車比，就划算得多啦！

尾箱大成咁，唔只送機，就連搬屋都幫到手喎。	波棍用咗藍面裝飾，同車頭嘅藍光廠徽襯到絕。	試車期間遇上大雨，由ECO Mode改用Power Mode，有較好嘅操控表現。

Power Mode步步有力

如果你仲以為環保車嘅操控性不足嘅話，小心畀人笑你Out，Prius就有三種駕駛模式畀你揀，分別係動力模式（Power Mode）、節能模式（ECO Mode）及電動模式（EV），一般情況下用ECO Mode行駛，行車反應屬中庸狀態；嫌唔夠激嘅話，轉去Power Mode，成部車嘅反應當堂爽晒，1.8公升直四引擎加埋電動馬達嘅總馬力去到136ps，就喺呢個Moment全數釋放。

三段駕駛模式之中，筆者認為Power Mode最好玩。	1.8公升直四引擎加埋電動馬達，總馬力去到136ps。	揸咗四日，每公里油費都只係$0.66/km，車主梗係讚好啦！

儀錶板適應需時

Prius儀錶板偏向窄身，位置上屬於中間偏右設計，駕駛時要花多些少時間適應，不過勝在有大屏幕，行車資訊一眼睇晒。另一方面，上一代Prius嘅大尾箱已經好抵讚，今代保留，切合Prius一向以來嘅實用派形象。

車檔案

車　　型：五門五座位揭背車

引　　擎：直四

容　　積：1,789c.c.

總　馬　力：136ps

最大扭力：14.4kgm/4,000rpm

馬　　達：同步交流電動馬達

馬達扭力：55.7kgm

電　　池：密封式鎳氫電池

傳　　動：電子控制無段變速系統（CVT）

驅　　動：前輪驅動

制　　動：（前）通風碟式連能源再生煞車系統 （後）制動碟

售　　價：$262,992

查詢：2305 4555（皇冠汽車）

揀Hybrid好過等

香港採用電動車嘅空間到底有幾大？最起碼嘅供電配套，依家都係只聞樓梯響，難免令人對電動車喺香港嘅前景只係「審慎樂觀」。如果你短期內會出車，又想為環保出一分力，已經發展成熟嘅Hybrid車種係目前理想之選，尤其是Prius呢類家用小房車，低耗油、低排放嘅效果更就顯著。