北韓鍾意用試射威脅全球，南韓則主張以手機技術領導世界。當中LG更是創意多多，手機調音、骰仔功能介面都係由佢帶起，今日更正式推出全球首部透明手機GD900 Crystal，透明鍵盤支援多點觸控，可以喺上面用手指畫出指令，操控各樣功能，又靚又實用，愛Elegant的女士們務必注意。

新作Crystal由LG手機工業設計實驗室的副總監Mr. Kim Youngho領軍，早於○五年已開始研發，並憑這概念設計贏得○六年Presidential Design Award大獎，經過四年的努力，終於將夢想轉化成現實。

Crystal Touchpad為無縫設計，近看亦找不到任何零件、電路。$3,980	拍攝模組藏於滑蓋下，鏡頭、LED閃燈及自拍鏡全部有齊。	Crystal Touchpad支援多點觸控，兩指拖拉便可放大、縮小圖片。

全透明一眼看穿

透明鍵盤，聽落已覺新穎，更估唔到是近看也找不到任何電路或零件。據廠商表示，這個Crystal Touchpad以觸控感應薄層取代傳統電路，因此除表面早已刻上的數字及英文字外，基本上可以一眼看穿。為提升耐用度，外殼更結集了強化玻璃及液體金屬兩大物料，具有吸震、防花及防刮等作用。實測所見，發覺佢無傳統鍵盤咁實在，但每按一下都有震動反饋，算是彌補不足，最正是使用時上下邊框會透射出白色柔光，夜晚拿出來用保證Eye Catching！

13.5mm機身唔算薄，剛好等於一張橫放SIM卡的高度。	多媒體頁面分開兩行，左邊揀歌、右邊睇相，篤兩下便能放大成全屏幕。	聯絡人大頭貼可以上下捽來揀人，若想觀看詳細資料，篤兩下就得。

畫公仔入指令

Crystal Touchpad唔係得個樣，還支援多點觸控，除打電話外，平時還有好多地方用得着，例如在上方開合手指就可放大縮小圖片、打圈可調節音量或改變鏡頭變焦倍數、或索性當成是手寫板輸入中、英文，還提供Gesture Command功能，只要在透明部分畫出指定「鬼畫符」，例如W、S及M字形，便可直接打開瀏覽器、訊息及音樂等功能捷徑；可惜暫時只提供十二款指令，又冇得自行修改，是美中不足。

支援手寫輸入，除上方的三吋觸屏外，下方的透明鍵盤一樣寫到。

內置十二款「鬼畫符」指令，例如畫M打開播歌介面，圖案簡單又易記。

S-Class繼續玩

Crystal並非智能手機，內建的是LG Arena早已用過的S-Class骰仔介面，但個人認為操作更美觀直接，倒貼合手機形象。鏡頭部分雖非「士拉打」出品，但亦提供八百萬像素，人臉對焦、微距拍攝及ISO 1600感光度等功能絕冇走雞，並可拍攝每秒三十格720×480像素影片，以Feature Phone來說絕對收貨。播歌則有Dolby Mobile技術輔助，並提供超過二十種EQ音場選擇，配埋1.6GB內置記憶體，唔使加卡都可儲足四百首樂章。

機檔案

制　　式︰GSM四頻、UMTS 900/2100MHz

屏　　幕︰3吋1,600萬色TFT，480×800解像度

鏡　　頭︰800萬像素CMOS

記憶體︰內置1.6GB、支援microSDHC記憶卡（最高32GB）

對外連接︰藍芽2.1、USB 2.0、Wi-Fi、7.2Mbps HSDPA

通話時間︰360分鐘（2G）、240分鐘（3G）

備用時間︰300小時（2G）、300小時（3G）

體　　積︰105×52.8×13.5mm

重　　量︰約121g

設計創先河

LG在初初設計Crystal時，已打算不只單憑透明外觀來吸引顧客，因此才在鍵盤加入多點觸控能力，論賣相、技術均創了業界先河。雖然實際使用時，會發覺它的反應不及傳統觸屏，但作為新嘗試絕對交足功課。官方更表示Crystal為過渡產品，將來還會添加新技術，不排除會推出全透明型號。