相機何需多，一部真正影到靚相的King of Snap經已夠照，GR系列向來是潮界機王，等了年幾終於出第三代GR Digital III，今次唔單止畫質進一步提升，連鏡頭都改用F1.9大光圈GR Lens，曹卓榣最愛夜晚唔使開閃燈都夠光影靚相！

影友都知道光圈愈大、鏡頭就愈貴，好似一支50mm F1.8千元左右有交易，但50mm F1.4卻要三千多元，足足貴了幾倍，除因為大光圈能輕易勾畫出淺景深外，更重要是去到室內或昏暗環境都夠光Snapshot，無需帶腳架閃燈咁麻煩。

手持夜攝唔會鬆

今次拎部GR Digital III開盡F1.9光圈去維港實試夜景，發覺選用ISO 800設定就夠手持拍攝，完全唔怕手震鬆郁朦，相比起其他人拎住幾斤重嘅腳架搬來搬去，便感受到大光圈手持拍攝有幾方便。最正是配合高靈敏度千萬像素CCD和新一代GR Engine III影像處理引擎，當偵測到高ISO時會自動啟動降噪功能，有效保留相片畫質和色調，令暗位細節清晰唔起渣。

預先對焦冇失手

大光圈另一好處是有效提升快門速度，方便捕捉動態和瞬間即逝影像，因此新機除了全手動和光圈先決外，首度加入快門先決和三組自設操控。為了令Snapshot更靈活，GR Digital III改用Pre-AF預先對焦系統，以全按抓拍（Full Press Snap）預先設定1米、2.5米、5米或無限遠對焦距離，倘若突然有嘢想影，一按就掂，行街打女都唔驚失手。

GR Digital III加入快門先決(S Mode)模式，同時在SCENE內引入DR動態範圍場景。

LCD右上角顯示FS字樣，可預設1米、2.5米、5米或無限遠對焦距離，方便全按抓拍。

高反差相一樣靚

別以為GR系列玩定焦復古，獨沽一味賣型格靚仔，其實機身同樣有齊新一代數碼功能，包括上代首創的電子水平尺、景深尺和色彩調控等。今次仲喺場景模式內，新增DR（Dynamic Range）提升相片動態範圍，只要按一下快門便會連拍兩張不同曝光值的相片，然後將光位和暗位細節互相補足，合併成高細緻度的靚相，即使反差大的環境都唔使怕，緊貼潮流趨勢。

採用雙供電設計，當鋰電池影到冇電，可即刻轉用兩粒AAA電芯繼續影。

GR Digital III (上)和舊款的外表沒大分別，但鏡頭改用F1.9光圈，影Snapshot更靈活。

試相區

動態範圍測試 啟動DR模式後，就算前景暗、後景爆、反差大的相片，都可重現景物細緻位。

廣角拍攝測試 手持拍攝夜景都唔會鬆郁朦，加上廣角鏡變成21mm後，連天星碼頭都影埋。

配件陸續有來

GR粉絲最關心應該係換機時，舊配件能否在新機使用，筆者對比過後發現，GR Digital III鏡位和接環都唔同晒，只有電池、觀景器和皮套能用得番。幸好新機同時帶來新系列皮套和廣角鏡滿足玩家要求，較吸引是換上千幾元的廣角轉換器後，就可變身21mm Wide，將型格與功能結合。

機檔案

感光元件：1,001萬像素CCD

鏡　　頭：28mm定焦鏡頭

光　　圈：F1.9至F11

快　　門：180秒至1/2000秒

L　C　D：3吋92萬像素LCD

記　憶　卡：SD/SDHC、內置88MB

尺　　寸：108.6×59.8×25.5mm

重　　量：188g

查詢：2292 5111