潮流興瘦身，新PS3 Slim換上45nm製程的新CPU後，降低咗耗電量同熱量，連Body都可以變得更Slim，尤其係腰圍（機身厚度）由之前的98mm勁減至65mm，足足細咗三分一，而且今次香港仲搶在九月一日凌晨（即八月三十一日晚上十二時）開賣，仲要早過日本兩日添！

如各位想第一時間搶購到PS3 Slim，記住八月三十一日晚收工後就要到銅鑼灣排隊，皆因首二百名買家可以同時免費掃走包括DUALSHOCK3無線手掣、主機直立架、雨傘、PS3遊戲、紀念Tee同4GB USB手指在內的六件精品，總值$2,000！

新Logo啞黑機身

PS3 Slim的功能其實可以話係冇任何變動，大體上都係繼承自現時80GB版PS3的設計，同樣不能向下兼容PS2遊戲、不能支援SACD、沒有內置記憶卡插槽，不過仲多咗個不能安裝其他操作系統的限制，但以一般用家來講，買部PS3返屋企都係用來睇Blu-ray碟或者打機，問題其實又不大。另外PS3 Slim會在操作介面上加多個「What's New」功能，畀大家瀏覽PSN有乜新內容及最近玩過的遊戲，而原有PS3機主都可透過升級至Firmware 3.0做到。

機面用上啞黑色取代原本勁黐指模的鋼琴面設計，另外亦換上更簡潔的「PS3」Logo。

PS3 Slim換了開機畫面，一着機就會彈出圖中的「PS3」Logo。

120GB加碼容量

當然PS3 Slim外形先至係重點，正如當年PS2出Slim版可以賣個滿堂紅；新機的機身細節位跟原有的PS3都有唔少差別，如轉換了新Logo，換上啞黑機面，同時由於改良內部設計，散熱位亦無以前咁礙眼。至於機身的厚度同重量方面都明顯較纖巧，厚度由之前的98mm降到65mm，重量由4.4kg減到3.2kg，分別少了34%和27%。雖然大家唔會拎住部PS3通屋走，但可以肯定擺位上會靈活過之前的版本。硬碟方面，PS3 Slim就換上120GB容量硬碟，就算再拍多幾輯《夏之盛放》寫真集都夠位擺，唔使再為要放棄Lavina抑或Rainbow而頭痛。

入碟位同PS3相似，不過開關鍵同退出鍵就冇再採用熱感設計，只是用上普通圓形按鈕。

PS3 Slim（右）比原來的PS3薄了33mm，大家一眼就睇到當中嘅分別！

長煲唔怕過熱

外觀雖然重要，但更多用家關心PS3 Slim機身薄咗，對散熱功能有幾大影響。第一代PS3確實熱到飛起，新PS3 Slim耗電量減到得250W，比60GB PS3時代的380W已低好多，所以就算PS3 Slim排氣孔唔算多兼位置較隱蔽，用佢來試玩《多樂貓歡樂喵派對》近半小時都唔覺得太熱，相信大家今次應該可以放心長煲。

換上更省電處理器及改良內部設計後，PS3 Slim即使沒有設置大量散熱孔都不會過熱。

用上早幾日先推出的新PS3遊戲《多樂貓歡樂喵派對》試機，玩足近半個鐘，機身都唔算太熱，抵讚。

PS3 Slim香港開賣會送大禮

地點：銅鑼灣京士頓街九號LCX

時間：九月一日凌晨零時

PS3 Slim開賣當晚首二百名買家，都可得到包括紀念Tee同紀念雨傘等總值$2,000的禮品。

放大圖片

AV友都讚抵

隨住影音廠商不斷劈價，入門Blu-ray機Sony BDP-S360同Philips BDP-3000都減到二千元以下，今次降咗價嘅PS3 Slim就有番競爭力，只是加多四、五百蚊就可以玩埋PS3遊戲，連好多較少打機的AV友都覺得抵！

機檔案

容量：120GB

體積：290×65×290mm

重量：3.2kg

推出日期：九月一日

查詢：http://asia.playstation.com/