想用筍價掃Netbook、數碼相機或者顯示屏？記住帶備充足銀彈逼入明天開幕一連四日嘅「香港電腦通訊節2009」，因為展銷攤位由去年的六百多個增至九百多個，淨係掃平貨都要用上大半日，加埋有明星親臨撐場和多項由大會舉辦的活動，唔行快步又點得呢！
明日「香港電腦通訊節2009」開幕日入場，除咗可以掃貨之外，仲可以睇吓今年兩位I.T.大使森美同吳雨霏（Kary），記住帶齊攝影架生，影星之餘，仲可以在今年大會特設嘅攝影專區大拍特拍！
精叻I.T.大使
每年的「香港電腦通訊節」都會邀請藝人擔任I.T.大使，今年便請來了森美和Kary推廣資訊科技，大會認為他們都擁有甚高的知名度，形象健康，深得業界歡迎，而且更有能力將I.T.知識推廣至各階層。對於被邀請成為今屆I.T.大使，森美跟Kary異口同聲都覺得榮幸，森美平時都會用數碼相機拍低身邊事物放上網跟聽眾分享，並且自覺識得揀功能出色嘅電子產品，係一位精明消費者；至於Kary就相當喜歡影相，希望可以在電腦通訊節學得一手專業攝影技巧，森美亦笑說可以充當模特兒讓Kary練習。
名師指導教影相
今年大會以「數碼．潮流．全方位」為口號，將多元化的潮流科技資訊帶給大家，而且還會安排多元化嘅主題活動，迎合不同人士。隨着數碼攝影愈來愈普及，今年大會亦特別增設數碼攝影主題區─夏日狂相（Summer Wonderland），場內用上繽紛的活力夏日做背景，配以專業燈光、椰林樹影、攝影器材等，加上駐場有名師指導及由不同攝影廠商開辦的攝影講座，參觀者都可以從中增進攝影知識。大會亦已在攝影主題區安排多位模特兒及跳舞表演供大家練習拍攝技巧，八月二十二日中午多位I.T.代言人亦會進駐「夏日狂相」專區。
代言人大賽爭寶座
大會另一焦點項目是「全港I.T.代言人大賽」，今年亦已舉辦至第六屆，除咗以往香港、珠海、澳門及廣州賽區外，今年還新增台北賽區，令比賽更加國際化。香港區選拔賽亦已經在早前順利舉行，冠軍黃穎君、亞軍潘詠兒及季軍許詠媚將會代表香港，跟來自其餘四個賽區的三甲佳麗，於八月二十二日決戰灣仔會展總決賽大舞台，爭奪「全港第六屆I.T.代言人」寶座，大家記得到場為心目中的冠軍打打氣。
電腦回收免排隊入場
今屆「電腦通訊節」亦繼續大力支持電腦環保回收，特別在一號展館外AD05攤位設立「電腦環保回收站」，大家可以攜同電腦、打印機、電腦顯示屏、掃描器、手提電腦、電腦配件等到指定攤位回收，為環保出一分力。為咗回餽有心參與回收嘅電腦用家，今年首五百名攜同整台桌上電腦、手提電腦、打印機、掃描器、CRT或LCD顯示器入場嘅人士，既可獲贈大會入場券一張，並且可經由特別通道進場，免除排長龍之苦。另外，今年I.T.環保之星官恩娜亦會出席於八月二十一日下午一時開始舉行的「電腦回收計劃2009巡禮揭幕式」。
「香港電腦通訊節2009」資料
地點 灣仔香港會議展覽中心一號展覽廳
日期 八月二十一日（五）至八月二十四日（一）
時間 上午十時至晚上十時半（二十四日將會提前在傍晚六時結束）
門券 $20（每天上午十時至下午一時設業內人士免費進場時段）
網址 www.hkccfexpo.com
候選佳麗心水I.T.產品
I.T.代言人要求美貌跟智慧並重，各位候選佳麗講起I.T.產品都頭頭是道，且看她們最喜歡的I.T.產品又會是甚麼。
1.香港區冠軍黃穎君（Burmie）
最喜愛I.T.產品：Netbook
原因：「我依家仲讀緊書，有時都要做Presentation，輕巧嘅Netbook就最幫到我，當然價錢平亦係好重要嘅因素。除功能外，我都會留意產品外形，個人最鍾意墨綠色機身，不過這部粉紅色VAIO W都好靚。」
2.香港區亞軍潘詠兒（Wing）
最喜愛I.T.產品：數碼相機
原因：「自己鍾意影相亦鍾意做Model，所以對數碼相機的消息都會好留意。目前擁有三部數碼相機，尤其鍾意數碼相機內置嘅一笑即拍模式，好容易就影到靚相。」
3.香港區季軍許詠媚（Katie）
最喜愛I.T.產品：數碼相機
原因：「自己擁有三部數碼相機，揀機時都好注重產品功能同操作，最好就有Touch Screen，如果可以即時將相片Upload埋上網就更方便。」
其他焦點活動
（I.T.產品拍賣會）
一如以往，今年大會亦會主辦I.T.產品拍賣會，精選貨品包括Sony PlayStation 3、Apple MacBook Pro 、Xbox 360、Pentax K-m數碼單鏡反光相機等逾四十款產品，有心掃平貨的買家記緊留意各競投時段。
（全港校際I.T.精英問答比賽2009）
為進一步推動I.T.文化及教育，大會跟深水埗區議會聯辦「全港校際I.T.精英問答比賽2009」。經過一輪淘汰賽後，六支中學隊伍（保良局百周年李兆忠紀念中學、聖公會曾肇添中學、民生書院、張祝珊英文中學、瑪利諾神父教會學校、宣道會陳朱素華紀念中學）將會在八月二十三日於會場進行總決賽爭奪冠軍。
（幸運大抽獎平）
大會在場外AD07攤位特設禮物換領站，只要在會場展銷攤位以單一收據計購物滿$500，就可即日參加「幸運大抽獎」，買得愈多，抽獎機會愈多。