人有料，唔怕人彈；車有料，就算子彈橫掃都冇有怕。雖然防彈車喺香港都幾冷門，不過唔代表冇市場，事關億萬富豪大有人在。越野路華（Land Rover）最近入咗兩款高規格防彈車—Range Rover及Discovery 3，淨係道尾門都重成二百磅，要炸穿佢唔通要用火箭炮？

車身 如練金鐘罩

驟眼睇，防彈版本嘅Range Rover及Discovery 3，個Look同原本型號冇乜分別，不過車身用料及結構就好似練咗金鐘罩咁硬，防彈及防爆破能力達到European Standard EN1522標準。具體啲講，喺槍械火力級別B2-B6中，兩部車都擋到最高級嘅B6，由麥林357左輪，到舊式嘅AK47，以至新式嘅M16A2及AK74等，彈頭口徑由北約嘅5.56至前蘇聯嘅7.62，都射佢唔穿。甚至連車底都抵禦到DM51手榴彈，加埋防火車身、頭冚，以及強化油缸，硬淨程度可比裝甲車。

車廂 設計有後着

除咗車殼硬淨，設計師仲預計埋萬一車身被爆破後嘅後着。用家可以啟動獨立車廂氧氣供應，配合run-flat輪胎，令部車仲有50km行駛能力，載住乘客逃出險境，車頭部分就安裝咗隱藏式警告閃燈及通訊系統，以便撤離時使用。買得起防彈車，都唔會唔請司機，廠方就為客戶安排埋專門嘅駕駛訓練，包括高速後波駕駛、快速掉頭及高速行駛，以及Off-road行車技術，確保閣下嘅司機唔係特種部隊出身都揸得掂。

Range Rover防彈版本

Range Rover嘅中控台屏幕對應前後鏡頭，邊個想埋身都一目了然。

尾門有成二百磅重，女仔人家都幾難拉得郁。

引擎艙被重重包裹，加埋防火頭冚，增加保護性。

變身防彈版本後，車重比原裝版本多咗一倍。

Discovery 3防彈版本

同Range Rover一樣，為安全考慮，所有車窗都唔開得。

Discovery 3嘅柴油偈都有「厚甲」保護，想射穿佢都幾難。

車廠安排嘅駕駛課程，包括差速鎖嘅運用方法，Off-road行車大派用場。

尾門內仲有一道防彈門，就算畀人從後偷襲都唔使驚。