筆者自認是籃球迷，連發夢都諗住點樣剷籃得分，但論到「狂」，跟今次受訪者Thomas Leung還差很遠。這位NBA狂迷二十年來花費過百萬港元，搜購各式簽名球衣及精品，甚至開舖做老闆，將所有珍藏盡情Show Off，就連紐約人隊的昔日知名控衞史達斯，來港都慕名而至。講到至愛球星，Thomas直言Kobe、Lebron都要行埋一邊：「無得傾，一定係籃球之神米高佐敦！」
走進Thomas的店內，與其說是精品店，不如說是NBA的小型博物館。全「館」放滿了他的激罕珍藏，由籃球、球衣、海報、磁石、砌圖，甚至球場地板都有，當中以公牛王朝的產品最多，他分享道︰「坦白講，近年NBA熱潮已無復當年勇，球星跟九十年代比較，亦爭咗份個人魅力。我開舖頭，除咗賣一啲重複咗嘅私人收藏外，仲想喚醒一眾Kidult嘅集體回憶。」其實Thomas的收藏已逼爆全店，一些較大型物品，都留在美國家中，如NBA吊扇連燈、公牛隊吹氣梳化，以及佐敦打過的棒球等，不過店內牆上三件23號簽名球衣，足以令佐敦迷「流晒口水」。
提早入場攞簽名
以前香港無ESPN，又無NBA頻道，想知道NBA消息，只有靠《奪標》或「體育世界」，Thomas憶起昔日的狂迷歲月︰「初時我只係儲籃球卡，但香港好難搵得齊，於是拜託喺美國讀書嘅家姐寄畀我。後來喺九三年我定居美國，就開始瘋狂搜購，直至依家，每年都會去美國嘅Colletors Show尋寶。」Thomas試過一個星期看足四場NBA比賽，還會提早入場，趁球星熱身時索取簽名，因此珍藏品不乏簽名版本，例如柏賓的Air Hype Uptempo波鞋和小鳥布特的熱身球衣等，就連Wilson當年為佐敦生日推出的Mr.June版金波都有簽名（即大相Thomas手持的金球），全部價值連城。
親歷佐敦顯神迹
Thomas當年家住三藩市，因此對該市球隊「金州勇士」有深厚情意結︰「我間舖叫TMC，就係紀念當年Run TMC呢個三人組。」但講到最酷愛的球隊，當然是東岸的芝加哥公牛︰「我好慶幸九十年代住喺美國，可以親眼欣賞佐敦打波，佢嘅代表性，至今無人能及，除咗因為十屆得分王、六次總決賽MVP等個人成就，最重要係佢將NBA帶到全世界。」約佔九成的收藏品就與佐敦有關，遠至八八年的入樽賽紀念球衣，近至○三年佐敦最後一場賽事的籃球卡都有，唯一遺憾是沒有Game-Used球衣︰「如果搵到，幾萬銀美金我都買！」
瓷碟燒足九十五日
珍藏眾多，唯獨不見AJ波鞋。其實Thomas以前都有儲波鞋，只是復刻版大量湧現後，才概然在○三年將它們全部賣掉︰「物以罕為貴，人有你有就冇意思，而且香港潮濕，波鞋容易發霉，好難保存。」他謂NBA收藏品要有「Cert」才值錢，最好有證書為憑︰「依家連球星簽名都可以冒，eBay流行後，假貨就更多，所以有證書先可以分辨真偽。」除此之外，收藏品還要限時、限地、限量才值錢，例如他的一套共十六隻的瓷碟，只曾在公牛六奪總冠軍時在芝加哥發售︰「最特別係每隻都燒足九十五日先造到，而且永不復刻，計造工，其他精品冇得比！」
籃球卡 最好炒
籃球卡是NBA的入門精品，大多由Upper Desk印製，時間愈久、價值愈高，部分極難抽到的版本，例如明星簽名卡、Insert卡及玻璃雷射膠卡，更被炒至逾千美元一張。
分清 NBA球衣
NBA球衣曾經由多間廠商贊助，七、八十年代有Mitchell & Ness及Wilson，九十年代則有Puma、Nike及Reebok，現在由adidas一家獨大，因此從贊助商的分別，便能大概分辨出球衣年代。姑勿論贊助商誰屬，它們都提供了多個不同版本。
Swingman（球迷版）︰
面料為網狀，只在歐洲部分國家發售，名字、號碼均為單層刺繡，有S、M、L及XL等標準尺寸。
Authentic（球員版）︰
面料分為網狀和絲印兩種，號碼、名字也有刺繡及噴染之分，尺碼用36、40、44、48、52來表示，產地有美國和韓國。
Pro-Cut︰
依球員尺碼而製，因此尺碼只有一個，造工跟Authentic一樣，只是長度加長，並有年份標籤，多數由薩爾瓦多生產。
Game-Issued︰
為球員度身訂造的比賽用球衣，但未經穿着，造工最好，不同賽季的尺碼或有不同。
Game-Used或Game-Worn︰
即是球員穿過的Game-Issued，價值最高，但真假難分，很多時也難以估值。
精選珍藏
雖然佐敦退休多時，但與其有關的商品仍極具價值，以下便是Thomas的部分至愛：
