筆者自問屋企部Wii都封咗塵好耐，但為咗《Monster Hunter 3》（芒亨3）都要再度攞出嚟Fing、Fing、Fing！啱啱「轉會」Wii嘅《芒亨3》，以人氣遊戲系列續集計，新一集的改動都有幾多，而且來得幾有誠意，譬如可以潛水圍劈海龍，又可以全程體感將Wiimote當太刀斬殺群龍，隨時玩到身水身汗！想玩埋Online組隊屠龍雖然要另外畀錢，但計落每日都唔使兩蚊，真抵打！
過往非任天堂開發的Wii遊戲，銷量都好一般，但係以《Monster Hunter 3》嘅級數就要另計，早兩日遊戲出貨量已超過一百萬，人氣爆燈。
體感操作更有Feel
《芒亨3》由PS平台過檔至Wii，操作上自然用番Wiimote嘅體感設計，將手掣當作太刀、大劍起勢屠龍，而且有唔少武器可以配合到Wiimote的轉向而組合出連招，玩落幾有新鮮感。實際操作上，體感屠龍都唔使太用力，輕輕一Fing已能感應到有關動作，怕玩到手抽筋嘅朋友，當然亦可以只按A掣攻擊或用Classic手掣玩，但係玩落無咁好Feel。
潛水打放電海龍
除咗全新嘅操控方式外，追加新怪物都係每一集的必然動作，今集主角就係海龍拉基亞克爾斯，外形似長頸龍，但就披上一身鱗甲，一出場已甚有霸氣，而且水底移動速度快，大家在潛水途中要埋到呢條海龍身邊都唔係咁容易。另外，這條海龍的攻擊招式又強，身體可以放電，又識吐出電波，仲會時不時擺尾攻擊，要小心應付。好在大家唔使兼顧抖氣，只係專注屠龍就可以，最好約埋朋友組隊一齊打，否則都幾難全身而退，同時如果能夠熟習唔同龍種的生活特性以及利用地形優勢，自然有更高勝算。
買點數卡玩連線
單機模式都係接任務賺取酬勞，但玩《芒亨》唔連線就真係爭啲，不過今次唔使再約朋友落麥記面對面打，想連線玩《芒亨3》就要先買Point Card，以30日/60日/90日券只係賣800/1,500/2,000日圓計，平均每日消費都係$2左右，抵玩過唔少Online PC Game，而且又唔愁冇人同你玩，連線模式既能組隊出戰，亦可以趁機交換道具，所以話唔Online玩就真係少咗好多樂趣。
手掣無用武之地
利用Wiimote體感操控屠龍比想像中易，只要Fing一Fing Wiimote就可以拔劍，嫌麻煩又可以用「A」掣或「-」掣取代，雖然用Wiimote玩上一、兩個鐘，隻手都幾攰，但就打得過癮好多，所以真係唔明點解《芒亨3》特別版仲要再送Classic手掣。
機檔案
類 型： 動作
開 發： Capcom
平 台： Wii
推出日期： 八月一日
售 價： 約$500
查詢：2725 3338