華英雄充滿民族氣節，絕不會與東瀛人結盟，何以會「和風重生」？原來去年已有傳聞，《中華英雄》密謀重出江湖，磨劍近一年，「和仔」鄭健和與玉皇朝雙劍合璧的《中華英雄前傳》，將於本年度的動漫節登場。就趁推出前，請和仔親自為「和風版中華英雄」解畫。
不戀舊 堅持個人畫風
Q：點解會有重畫《中華英雄》嘅構思？何解會選擇同玉皇朝合作呢？
A：其實舊年我同一班同行食飯，傾吓傾吓，大家都想試吓合作，我哋都傾過幾部作品嘅可能性，最後揀咗《中華英雄》，始終係佢最有吸引力。至於同玉皇朝合作嘅原因，因為我未試過喺呢間公司工作嘛，我相信會好有新鮮感，整個合作過程中，真係幾開心，學到唔少嘢。
Q：《中華英雄》喺當年係銷量第一本地漫畫，至今仲未有人破到紀錄，今次重畫會唔會有壓力？
A：壓力點都會有，不過我唔會太在意，亦唔會刻意比較。其實當年嘅畫功、故事已經好好，今次我會用自己嘅方法，盡力做好就得。我唔會模仿馬Sir嗰套，一定用番自己Style，我都唔希望《前傳》唔係鄭健和Style。
至難忘 自由神像作擂台
Q：故事方面，《前傳》會跟番原著行稿，定係會有大改動呢？
A：主線都會用番原著嘅脈絡，但係會加入新嘅分支，尤其是華英雄、無敵決戰前嘅成長部分，而原著又冇交代到嘅故事。
Q：《中華英雄》裏面，你最鍾意邊個角色？邊個場面又令你最難忘？
A：都係華英雄，其實最初睇《中華英雄》，抑或喺唔同時間翻睇，都對我有好深影響。至於場面呢，都係最經典嗰幕，即係華英雄同無敵喺自由神像決戰嗰一段。
Q：就以依家連載緊嘅《殺道行者》為例，你講古仔嘅手法好有電影感、好流暢，唔似傳統本地武俠漫畫，會喺畫面大大隻字Show招式名，今次《中華英雄》又會點處理？
A：始終《中華英雄》係經典嘅香港漫畫，畫面編排上都想有番昔日味道，所以今次我會喺出招嘅場面上加番招式名。
（編者按：咁又係，如果華英雄出「中華傲訣」時，畫面少咗「東方浩然」、「劍氣長江」呢幾隻大字，又真係差少少喎。）
前傳有段古
暫定為十二期完的《前傳》，以原著中華英雄與無敵決戰前後的故事為骨幹。話說華英雄與撒旦將軍結仇，導致妻離子散之餘，更被十大殺手狙擊，幸有劍聖出手相救，並啟蒙他創出「中華傲訣」；東洋高手無敵為追求至高境界，求教刀中不二之餘，更不惜殺盡至親。在自由神像上，華英雄仍然念及親情，以至出招有所牽掛，相反無敵已變得絕情絕義，刀招毫無顧忌，此消彼長之下，華英雄會否命喪無敵刀下？
做足存稿保質素
訪問期間觀賞原稿，主線條確是和仔那種簡潔而有力的筆觸，至於畫面的細節位，就落足網位、打足幼線，玉皇朝的後期配合果然出盡功力，令《前傳》既有和仔自然流暢的個人風格，亦有當年原著的精細風格。據監製梁光明表示，第一期除了封面，內文統統棄用彩稿或CG，以全人手畫成，將主編以至助理團隊的真實力Show Off。那麼第二、三及以後期數，又能否保持水準呢？漫畫迷大可放心，訪問時和仔向大家派定心丸：「我寫起咗十一期存稿喇！」