返嚟喇，小雲、小吉，仲有則卷千平等老朋友，原來將成條天神村搬嚟香港！喺「青衣城IQ博士21世紀天神村」內，宇宙大王嘅太空船、茶壺形嘅Cafe、小雲至愛嘅米田共、IQ博士嘅小屋，呢啲深入民心嘅景點梗係唔少得，仲有「屋主」駐場迎賓，等緊各位Fans探佢哋。

八大親切景點

即日至八月三十一日期間，青衣城嘅夢幻大堂變身天神村，Fans即場捐款畀香港公益金，就可入村觀光。村內共有八大主題建築，跟足動漫版本嘅天神村造型，當然唔少得相關嘅故事人物，Fans記住帶定相機；另一方面，多項景點都以科學及環保為主題建成，向大家介紹有機耕種、廢物分類回收及自然科學小常識，有得玩又有嘢學。順帶一提，村內除有企定定嘅IQ博士塑像等住同你影相，仲有真人打扮嘅小雲、小吉及博士突然現身，送你紙製嘅小雲經典黑色粗框眼鏡外，只要你再多啲善心、額外捐款$20起，就可以同佢哋合照，Fans入場要打醒精神喇！

門口正上方仲有小吉，你哋飛還飛，唔好食咗啲鐵枝呀！	除咗濃縮版天神村，村外仲有十二呎高嘅吹氣小雲公仔等緊你。	IQ博士研究探知館除咗有則卷千平恭候各位，屋內仲有科學互動小遊戲，考考各位嘅常識，一家人齊齊玩，可能大人輸畀細路哥。

木綠茶藝館

造型神似，茶嘴仲識噴煙，Cafe內仲有多款《IQ博士》嘅珍藏品，歡迎Fans鑑賞。不過計我話，最吸引都係Cafe前嘅小雲同牛奶糖！

環保有機小菜園雖然菜田上嘅米田共只係擺設，並非真係「有料到」，不過矮瓜、蜜瓜及小唐菜等蔬菜都係用有機材料種植，健康又環保。	宇宙大王太空船宇宙大王同隨從齊齊駕臨，太空船造型跟足原著，船身仲有一個潛望鏡，哄埋去睇睇，原來播緊《IQ博士》歷年來嘅經典場面。	環保自動草菇園草菇小姐一邊踩電動單車，仲會一邊嗌「電髮，電髮，毛蟲都要電髮」，將《IQ博士》經典一幕立體化呈現。

IQ博士角色大搜查喺菇形壁布板上，有多位村民嘅大頭相，原來背後另有玄機，揭一揭，就有相關角色嘅簡介，你又認到幾多個先？	宇宙大王廢物回收知識筒宇宙大王出聲提提你，三色回收筒上有顯示屏，教你回收分類小知識，以後要識分喇！	氹氹轉咖啡杯喺太郎爸爸嘅蟹形飛髮舖前面，太郎已經Set定頭、好有型咁企咗喺咖啡杯好耐，等住同各位靚女氹氹轉。

活動小資料

名稱：青衣城IQ博士21世紀天神村

日期：即日至8月31日 地點：青衣城1樓夢幻大堂

時間：正午12時至晚上10時 查詢：2186 7284

服裝查詢：2506 3139（a：Marathon）、2506 3928（b：Catalog）