雖然個個都話無驚喜，但係最近手機場內的熱門話題，始終離唔開iPhone 3GS。呢頭有網絡商啱啱至公布上台價，事隔一日，Apple的網店已有iPhone 3GS齋機賣，16GB同32GB版本分別賣$5,388和$6,288，兩款都齊色，聽聞外國已開始缺貨，有買趁手。至於水貨方面，由於Apple今次的齋機定價十分進取，好多水貨商都始料不及，所以近日先達廣場的iPhone 3GS水貨價都即時插水，賣八、九千蚊一部都有人排隊搶購的光景已不復再。既然賣價唔夠行貨平，咁又有乜生意可以做呢？先達有個別舖頭就改為高價收行貨機，聲稱「舉行貨有錢賺」，好像16GB的3GS收機價達$5,500-$5,800，但收回來的手機係等行貨缺貨時坐地起價，或是再外銷就不得而知啦！