為咗配合Windows 7新世代作業系統嘅推出，Mic記啱啱公布咗個Windows 7升級計劃，首先講吓零售版嘅情況，由即日起購買獨立盒裝Vista嘅用家，畀多$150就可以進行升級，都算幾經濟；而購買OEM組裝版Vista嘅砌機友，只要上網登記妥當，Mic記就會喺Windows 7推出後將升級版寄畀你，變相有得免費Upgrade，計落最抵，但問題係呢個升級計劃只適用於Windows Vista Home Premium、Business或者Ultimate版本，而砌機友又通常選擇安裝最基本嘅Home Basic版，所以唔係人人可以受惠。至於購買廠機的話，就要視乎廠方有冇參加呢個計劃，收費亦係由廠商自行決定。嫌麻煩不如等預載Windows 7嘅新機出咗先買好過，因為官方話Windows 7將於十月二十二日作全球發行，但據講香港都仲未決定到係唔係同日，不過斷估都唔會相差太遠。