近年唔少車廠都鍾意喺賽車場舉辦試車活動，最近保時捷（Porsche）就喺上海國際賽車場進行為期二十一日嘅「2009保時捷全球路演」，除咗有基本嘅繞雪糕筒、緊急煞車，大會仲加入越野及賽車訓練，每名參加者都有機會駕駛911 4S學習賽車Apex線位，喺賽道上以時速200km/h怒轟！

導師醒幾招

為咗今次活動，廠方準備咗二十五部頂級跑車及SUV，讓超過七百名車迷及媒體參觀，仲有廠方教練提供專業指導。可惜大部分時間都係傾盆大雨、賽道積水，進行緊急煞車訓練就如溜冰，筆者掃低幾件雪糕筒之餘，仲要畀導師Kenneth開玩笑：「好正常，there's no grip，所以落雨應該開慢啲！」到底廠方導師過咗咩料畀我哋？依家就一一送上。

喺濕滑路面緊急煞車好易失控，預早減慢車速先係上策。	場內展出保時捷最新嘅GT跑車Panamera Turbo。	廠方導師Kenneth表示，要快就必須走啱線位。

繞雪糕筒（Slalom）

目　　的：學習扭及油門控制等技巧

導師揸住部Cayenne GTS玩甩尾，兩個圈後輪胎就會變成咁。	上海國際賽車場於二○○四年落成，設施達國際一級水平。	保時捷（中國）汽車銷售有限公司首席執行總裁柏涵慕表示，明年有機會推出Panamera V6。

訓　練　車：Cayman、Boxster

落住雨進行訓練，難度頗高，好似溜冰咁跣。	Road Tour環節跟隨導師嘅引導車，學習走Apex線位。	進入越野路段前，最好將車身升高，減低撞到車底嘅機會。

導師指引：繞雪糕筒需要保持均速，而且盡可能喺雪糕筒旁邊繞過，唔好做出太大嘅「S」形，以免浪費時間；只要喺頭轆駛過雪糕筒就即刻扭，就可以有最暢順、最快嘅效果。

操控（Handling）及道路駕駛（Road Tour）

目　　的：學習賽車線位

訓　練　車：911 4S、Cayman S、Boxster S、Cayenne GTS

導師指引：想要做出最快圈速，就必須走啱線位，並以慢入快出嘅方式過彎。此外，彎中要保持速度、切忌踩Brake，直至出彎時先踩油加速。

越野（Off-road）

目　　的：學習喺泥濘路嘅駕駛技巧

訓　練　車：Cayenne Turbo、Cayenne S

導師指引：玩越野必須以低波、慢速進行，切勿高速衝上山坡及衝水氹。此外，喺非緊急嘅情況下，落斜應用Engine Brake及Hill Decent Control減速，大力踩Brake分分鐘會翻車。

特派記者：Simon

鳴謝：Porsche Centre HK