今日適逢7.1回歸假期，有人去郊遊、有人去維園，遇上遊行交通受阻，梗係要諗辦法上吓網、睇吓片。但用iPhone又嫌個芒細、Netbook又太大陣仗，好彩aigo愛國者近期引入新版MID，在4.8吋機仔內加入HSDPA 3.5G模組，只要插張SIM卡就可篤芒上網，好簡單。

其實上年aigo已推出首款MID（Mobile Internet Device），針對需要比Netbook更輕巧的網絡人士設計，不過當時只得Linux版本，無論設計和驅動程式都未臻完善，直至近期才加推3.5G版本，終於預載我們慣用的《Windows XP》以及HSDPA流動數據裝置，五千元左右的價位確係吸引。

300g電腦 隱藏鍵盤

很多人對MID都有誤解，認為只是用來上網的工具，實質它是一部比Netbook更細小便攜的個人電腦，就以aigo MID為例，內置Atom新一代Z500處理器和8GB SSD硬碟，入Windows只需三十秒，效能與一般Netbook差不多。最吸引是4.8吋機身重量只有300g，輕過一包大檸檬茶，袋落手袋都唔覺得重，拎出來一篤即可上網和工作，當唔想篤芒操控時，只要推出QWERTY鍵盤便能打字，望落有點似滑蓋電話。

SmartKey按鍵 擴充方便

雖然MID得手掌咁細部，但基本USB、耳筒、視像鏡頭全部有齊，可能有人嫌8GB SSD容量有點到喉唔到肺，因此機頂已預留MicroSD和mini-USB插位，方便接駁記憶卡和外置硬碟/手指來擴充容量，周邊規劃設計得相當貼心。至於操控方面，機面特別加入SmartKey按鈕，除了能一按設定網絡和藍芽功能外，更可調校屏幕光暗，以及自定F1至F12快捷鍵，方便用家快速啟動常用程式。

隨機備有保護套、耳塞和迷你叉電器，帶晒去旅行都得。	揭開機底便看到SIM卡槽，只需插入Data SIM即可上網，速度視乎網絡商而定。	手掌咁細的機身只有300g，女士們袋落手袋都唔覺重，可說是隨身上網良伴。

超薄鋰電池備有2,700mAh容量，配合Atom省電平台拎出街可用上三至四小時。

機頂預留MicroSD和mini-USB插位，想擴充容量或接駁周邊裝置都相當容易。

右邊備有一粒SmartKey按鈕，能快速設定網絡和快捷鍵功能。

SmartKey採用半透明介面，篤芒設定網絡、屏幕和快捷鍵，相當易用。

3.5G加WiFi 隨時上網

政府近年力谷「Wi-Fi通」上網服務，至今在數百個政府場地都可免費上網，夾埋麥記、咖啡室、電話亭等有超過一萬個熱點，搵地方上網絕對無難度。不過Wi-Fi最大的缺點是要「企定定」連線，行出接收範圍就會自動斷線，所以便需要3.5G網絡彌補Wi-Fi流動性的不足，好似aigo MID機底便加入SIM卡槽，只要收到電話訊號就能用HSDPA上網，筆者試過在港島不同地方用3.5G睇on.cc即時新聞，發覺只需幾秒便Load到，等車等人時可說是最佳良伴。

維園 經過維園見到有人舉牌，順道當MID係繪圖板宣洩不滿。	灣仔 想知道最新情況，以3.5G HSDPA上on.cc睇即時新聞，Load網頁都唔慢。	中環 利用三十萬像素鏡頭自拍短片，然後經「Wi-Fi通」上網放上YouTube。

播片流暢 升級困難

MID上年才正式面世，但一直欠缺大廠支持，所以聲勢遠不及Netbook。不過論功能，MID跟Netbook實在有得揮，筆者試過播放RMVB和MPEG2影片就非常流暢，只是播全高清片時才有點窒。另一要留意的是Aigo MID為了減省體積，硬件全都焊死在主板上，想升級記憶體或更換高容量SSD就有點困難。

機檔案

顯示屏：4.8吋輕觸式屏幕（800×480）

處理器：Atom Z500處理器

記憶體：512MB

硬　　碟：8GB SSD

其　　他：內置3.5G HSDPA模組、三十萬像素鏡頭、MicroSD插槽、藍芽

尺　　寸：152×80×21mm

重　　量：300g

系　　統：Linux、Windows XP

查詢：3428 3449