當筆者細看巴士狂迷郭炳華為我預備的相片時，其中一張見他坐在司機位上作開車狀，腦海中很自然聯想起早前網上懷疑有人揸大膽巴士的片段，郭先生會不會就是……「唔係我揸，我只係坐上車影張相。」郭先生指相中的巴士，正是他的收藏。「真巴士嘛，我有三架，一架丹拿A，一架GUY（佳牌），一架丹尼士巨龍。」這位巴士狂迷的模型精品收藏過千，還開設多間巴士專賣店，現時更落手落腳製作巴士精品。郭先生謙稱收藏品不算太多，亦無刻意強調其價值，只想結交更多愛巴士的同道中人。
郭先生還記得第一次擁有巴士玩具，是在八、九歲的時候，從那時開始就愛上巴士，「當時日日搭巴士，特別有感情。」巴士迷坐巴士，跟平常人有甚麼不同？「我搭巴士只會坐兩個位置，一係上層第一排，景觀開揚，無拘無束；二係坐喺最近司機嘅第一行，可以睇清楚司機點樣揸巴士。」郭先生強調喜愛巴士是興趣，這興趣亦驅使原本開畫室的他，改行賣巴士精品。「最初香港巴士迷唔算太多，到九三年，香港先正式推出巴士收藏精品，到九七年算係普及咗，差唔多呢個時候，先發現香港都有好多巴士迷。」
反應好 改號碼再出
早年巴士精品多是來自英國，現時本土出品比英國貨有過之而無不及，「幾十年前，香港真巴士都係由英國運來嘅二手貨，依家情況啱啱掉轉，連巴士精品都一樣。」
「收藏最重要係講興趣，唔係一味講價錢，玩開嘅人都唔會以價錢行先。」郭先生說現時行內的做法是先出一千至二千輛，再看市場反應定奪。「一個巴士精品嘅原模，花費三十至四十萬元，廠方覺得款式反應好就會再出，但一定唔會原裝照出，通常會改路線號碼、車身招紙等，既可以照顧玩家，又唔會削弱收藏價值。」造巴士精品，看似是簡單的工序，其實大費周章，如郭先生所述，要造一款巴士模型，事先要拍攝約五百張數碼相片，以及為真巴士度身，才能造出百分百像真的巴士精品。
鍾情舊巴 最愛丹拿A
筆者搭巴士經過九龍城舊機場對出或紅隧入口，不時見到有巴士迷舉機影巴士，郭先生還有這個習慣嗎？「以前影好多，兼且出埋書，但係依家太易影喇，而且現代嘅巴士款式太四平八穩，冇咗舊款嘅線條美。」在眾多巴士款式中，郭先生獨愛丹拿A型，「我睇住佢大，佢又睇住我大。」翻查資料，丹拿A型在一九四九年服役，是香港第一款雙層巴士，但於八三年正式退役，後生一輩怕且未曾親身搭過吧！
倫敦市集尋寶
雖然郭先生說香港的一般巴士迷，都會儲到五百輛巴士精品，他那一千輛不算大數目，但他的收藏品，有不少已停產多時，珍貴程度非比尋常，他說：「以前我會去英國嘅地攤搵心頭好，好多細個時玩過又唔見咗嘅型號都搵得到，但價錢相差可能幾十倍！」
請T牌人幫手撻車
據郭先生所說，買退役巴士不太難，通常巴士公司會將行駛十五至二十年的巴士出售，如他所擁有的三輛巴士，每輛平均只花約五萬元，困難在於怎樣打理這些大個子老爺車，「平時會將巴士泊喺上村、錦田一帶嘅車場，每個車位都要月租千幾蚊；隔一段時間又要開動引擎，我會請有T牌嘅朋友代勞，否則油喉容易硬化，又易水滾，好易報銷。」據他所知，香港有超過十五個巴士迷擁有退役巴士。那麼，舊巴士會升價嗎？「鐵價升、自然會升！」郭先生當然沒有將收藏當廢鐵變賣的念頭，正構想為每架巴士製造帳篷，以免它們日曬雨淋，將來更希望將它們完整保存，他日轉送到博物館展覽。
精品巴士七至十個月完成
精品巴士貴在細位都造得極神似，郭先生說由籌備、拍照度身、製造鑄模到製成完成品，花上七至十個月時間，而且每個座位、水撥、扶手架等細件都是逐件逐件安裝，跟幾塊膠啤出來的玩具有好大分別。
八月又開Show
每年一度的巴士模型歷史展覽，將於今年八月舉行，地點跟往年一樣同在旺角始創中心，為期約兩星期。今屆展覽除有一系列巴士模型外，還會展出中巴物品、舊車票、1:1駕駛室以及香港第一輛一九四九年服役的雙層巴士等。至於展覽詳情將在本月中公布，各巴士迷記得留意。