用二次大戰甚至科幻題材做背景嘅射擊遊戲玩得多，都想試吓新嘢，咁就不妨諗下呢套以十九世紀六十年代美國南北戰爭為背景嘅《Call of Juarez：Bound in Blood》，仲可以試埋做西部牛仔嘅滋味，玩落都好有特色。
遊戲第一集於三年前推出，今集故事只係抽番第一集其中一個主角牛仔Ray出嚟整番套前傳，睇吓佢點樣逃避南方軍、墨西哥人、印第安人、西部牛仔嘅追殺，故事性強過依家好多無厘頭嘅科幻射擊遊戲！
上集主角拍前傳
上一集《Call of Juarez》照計唔會有太多玩家玩過，不過以西部牛仔為題材，兼用上一正一邪角色做主角，營造出來嘅氣氛跟其他射擊遊戲又確實好唔同。今次續集或稱為前傳，以上集正義嘅牛仔Ray做主軸，講述佢由參軍打美國南北戰爭開始，點樣為咗家庭而做逃兵，仲要避開四面八方而來嘅敵人，從一八六四年喬治亞州一路殺落墨西哥，兼且順便去搵埋傳說中嘅阿茲塔克（Aztec）寶藏，過程夠晒驚險刺激。《Bound in Blood》同樣用番第一集條橋，就係玩雙主角，除咗牛仔Ray，今次仲加埋佢細佬Thomas，除咗初段只可揀Ray外，其後各版都可以任用Ray或Thomas完成任務。
懷舊武器更有Feel
當然牛仔Ray同Thomas嘅專長各有唔同，遊戲畫面內會見到Ray學足Mark哥咁揸住雙槍，擅於近距離戰鬥，仲識得使用爆炸品；而Thomas就較擅長遠距離攻擊，而且亦能放暗器。雖然冇話一定要用某個角色過版，不過若然可以睇清楚任務簡介再揀角色玩，就會慳水慳力好多。
由於遊戲背景設定為十九世紀時期，所以可用到嘅武器就只有左輪手槍、霰彈槍、大口徑榴彈炮以及機關槍等，感覺上都幾Low Tech，但玩落又幾有風味；尤其有一版要在高處用大炮制止一班搶灘嘅敵軍，雖然大炮殺傷力強，但瞄準有啲難度，而且入彈時間甚長，相當真實但都幾難玩。
集中精神 橫掃千軍
火力未夠強，又有甚麼辦法對付敵人呢？《Bound in Blood》設有一個名為「Concentration」嘅模式，只要之前開槍打中敵人，集中力指數就會上升，當儲滿後就可以發動「超必」，呢個時候畫面會暫時停止，玩家可以在有限時間內用右Analog掣控制準星掃射畫面上嘅敵人，當畫面回復正常後，被掃射過嘅敵人就會被集體槍決，手指夠靈活嘅話，隨時可以一次過掃低晒四面八方嘅敵人，最啱被敵人圍剿時使用。
牛仔決鬥 考你反應
除咗一般開槍掃射外，《Bound in Blood》玩法亦好多元化，例如可以騎馬攀山越嶺、坐馬車及獨木舟在西部奔馳，另外當然仲有牛仔遊戲嘅精髓「牛仔快槍決鬥」。在快槍決鬥中，大家要將角色嘅手移向手槍，然後鬥快拔槍瞄準同開槍，好考大家嘅協調性同反應。射擊遊戲當然唔可以缺少連線模式，遊戲支援最多十二個玩家連線對打，而且仲可以從土匪、快槍手、歹徒、礦工等十三種職業任揀，比起其他射擊遊戲選擇多好多，而且角色設計仲幾爆笑添。
唔易頭暈眼花
筆者好怕玩畫面轉得極快嘅射擊遊戲（例如以科幻為題嘅遊戲），好易玩到頭暈兼作嘔，但係由於《Bound in Blood》場景設定為百幾年前嘅美國西部，冇裝甲、冇飛行器，敵人又唔似二次大戰遊戲咁一擁而上，好啱新手玩。
機檔案
類 型：射擊
開 發：Techlab / Ubisoft
平 台：Xbox 360、PS3
推出日期：今日
售 價：$329
查詢：2725 3338