今晚終於有得睇《變形金剛：狂派再起》（Transformers：Revenge of the Fallen，簡稱「變2」），劇情晨早通晒天，其實今集有唔少變車嘅新角色，型就型喇，不過呢啲美國車對香港人而言，都幾陌生喎！唔使怕，就趁入場前刨咗本文先，包你睇得更投入，仲可以升呢做「變2車博士」，同班Friend認叻呀！

今集博派繼續以車為主，好似柯柏文（Optimus Prime）、鐵皮（Ironhide）及力捷（Ratchet）呢三位舊角色，分別繼續變身成大拖頭Peterbilt 389、農夫車GMC Topkick 4500，以及越野車Hummer H2；至於新角色Sideswipe，以及孖仔Skids及Mudflap等，就各自變成概念超跑及揭背車仔，唔使審，車迷一定Buy博派。

Skids（右）及Mudflap（左）兩位小師弟，今集將會夥拍師兄大黃蜂（中）力抗狂派。	第五代Camaro喺今年終於定型生產，造型上，設計師刻意向一九六七年嘅第一代致敬。	無論係機械人Sideswipe，定係跑車形態嘅Stingray Concept，造型都充滿未來氣息。

超人氣Camaro 終於投產

上集風頭仲勁過柯柏文嘅大黃蜂（Bumblebee），今集繼續「孭重飛」，至於佢嘅第二身份—Chevrolet Camaro，已經由Concept Car變成量產型，喺今年初嘅芝加哥車展及上海車展亮相後，已經喺美國本土發售。全新Camaro屬於車系第五代產物，前置引擎、後輪驅動，備有LS、LT及SS三個版本，前兩款都係用3.6 V6，後者係頂級版，升級至6.2 V8，配六速手波，馬力及扭力分別高達426hp/5,900rpm及42.8kgm/4,600rpm，仲有LED頭燈及二十吋大輪圈，睇嚟跑車形態惡過機械人多多聲喎！

喺「變2」之中咁多跑車型號，相信香港人最熟悉嘅係R8，佢嘅「真身」係狂派Sideways。	Skids嘅另一個身份係小型揭背車Beat，定位與本田Jazz及豐田Yaris接近。	Mudflap可以變身成Trax，後者係一款小型SUV概念車。

Stingray VS R8 大鬧上海

今集其中一場重頭戲，就係博狂兩派喺上海爆發飛車追逐戰。博派代表係Sideswipe，可以變身做Chevrolet Corvette Stingray Concept，高度科幻化嘅造型，原來糅合咗一九五九年Stingray及六三年C3嘅設計特色，性能方面……無可奉告，因為呢部只係一款概念車，廠方仲講明唔會量產，名副其實「得個睇字」。至於狂派對手Sideways，可以變成奧迪（Audi）R8，後者喺二○○六年已經投產，就以4.2 FSI R-Tronic版本為例，4,163c.c.嘅V8引擎，馬力及扭力分別高達420bhp及43.9kgm，身價高達$2,032,000。到底Stingray Concept定係R8好跑啲？入場先知喇！

上集已經登場嘅力捷（後），連埋新角色Sideswipe（前），都係柯柏文嘅得力助手。	卡通化嘅造型，一睇就知Skids及Mudflap專門喺戲中引爆笑彈。	想起我哋博派嘅底細？你知唔知我哋識得變咩車先？（設計對白）

Beat & Trax 孖仔引你笑

電影中連環搞笑嘅Skids及Mudflap，係博派陣營嘅一對孖生兄弟，就連車款都有Twins關係。呢兩個奀皮仔可以分別變成Chevrolet嘅Beat及Trax，都係揭背概念車仔，前者用1.2公升Turbo引擎及三門布局，屬於城市用小汽車，二○○七年喺紐約車展首度現身後，喺今年嘅北美車展上，進化為新版本Spark再現人前。

Trax亦喺○七年紐約車展曝光，五門造型比Beat剛強得多，近似小型SUV嘅風格，底盤亦用咗全時四驅，Off-road能力自然比Beat嘅前驅模式強得多，不過引擎就弱啲，只係1.0公升自然吸氣，就連廠方都唔打算量產，真陰公。

有得睇冇得買

心水清者，可以計得出「變2」嘅大部分車款，都出於美國品牌Chevrolet，呢個牌子屬於通用（GM）旗下。依家通用遭逢巨變，前途未明，而且重整架構、縮減生產線難免，除咗已經有售嘅Camaro，其餘車款會唔會投產，睇怕奧巴馬都答你唔到，何況香港一向冇入口Chevrolet，本地老變迷想買番架戲中車款做Dream Car就難上加難。