第三代iPhone 3G S手機六月十九日於美國引爆，上台價為199美元（16GB）及299美元（32GB），若果唔想跟AT&T簽約兩年嘅話，都可以用淨機價599美元及699美元購買，而向來快人一步嘅先達水貨佬日前已率先引入，16GB最低消費$7,000，但全部未解鎖，要解就要畀多幾百至一千元，並需時數天至一星期，計落都仲快過最快七月九日才見街的香港行貨！

速度倍增唔再窒

實物所見，3G S無論手感、重量均與舊款相若；唯一分別是背面印有32GB字樣，而且略為反光，比啞色字樣的舊版醒目。3G S的最大賣點是執行速度比舊款快兩倍，測試當日筆者連開數個軟件，或進行衞星定位，感覺的確比舊款爽快，尤其是影完相後儲存相片，以往的遲滯感不再復見。另外，3G S已經更新至iPhone 3.0作業系統，因此Copy & Paste、MMS等功能已移植過來，此外上網速度亦升級至7.2Mbps HSDPA，唔怕睇睇吓YouTube又要等Load片。

鏡頭升級至三百萬像素，並終於支援自動對焦，但微距功能仍然欠奉。	3G S的機背寫上32GB字樣，字體亦較為反光。	iPhone 3G S唔再用《QuickPwn》解鎖，但網上未聽聞有人成功。

獨家功能勁方便

雖然新iPhone外形變化不大，但就內置咗多個獨家功能，例如可配合Google Maps使用的電子指南針，夠大夠清晰，以後行山就唔怕迷路；同時又多咗聲控功能，口講就識得幫你搵歌搵朋友，連手寫輸入都慳番！

另一輔助功能是VoiceOver，點選屏幕上任何文字，手機便會立即讀出，可惜是機械聲，唔夠好聽。	短片會變成菲林格仔顯示出來，用手指按實便可以快速搜畫或作簡單剪接。	影相時會有個藍色方框代表自動對焦，也可篤其他位置選擇對焦點。

至於鏡頭像素亦由二百萬像素升級至三百萬像素，並追加手動對焦，篤一篤屏幕便可任意揀選對焦點，輕易玩到淺景深效果。新機亦支援拍攝VGA短片，而且冇長度限制，另外篤吓上方的菲林格仔便可選擇開始及結束位置，方便進行簡單剪接。

Voice Control功能可以用聲音控制iPhone，搵歌之餘仲可以搵朋友。	水貨iPhone 3G S由G-World率先引入，店主Lo哥話舊iPhone的回收價即時插水。	舊iPhone身價即時插水

3G S已被破解？！

iPhone 3G S升級至3.0版本後，理應不能以軟件解鎖，但著名破解組織iPhone Dev Team日前卻聲稱有新工具《redsn0w》可把全部3G S解鎖並完全Jailbreak，令手機可加裝非官方發布的應用程式；但始終非正途方法，壞機風險高，讀者咪亂試！

機檔案

制　　式︰GSM四頻、WCDMA 850/1900/2100MHz

用戶平台︰iPhone OS 3.0

屏　　幕︰3.5吋1,600萬色TFT，320×480解像度

鏡　　頭︰300萬像素自動對焦

記　憶　體︰內置16GB或32GB

對外連接︰藍芽2.1、USB 2.0、7.2Mbps HSDPA、Wi-Fi

通話時間︰ 12小時 (2G)、5小時 (3G)

備用時間︰ 300小時 (2G)、400小時 (3G)

查詢︰2396 6380