以前，人養狗只為看門口，但現代人卻把狗仔視為己出，着靚衫、瞓貴床，簡直是家中的皇帝。年僅十二歲的Celina，愛狗如命，雖然生在富貴之家、有工人使喚，堅持親力親為照顧愛犬Bubble，更每日上網物色靚衫畀愛犬，閒閒哋每次都豪使過萬先收手！

愛犬Bubble是Celina姐姐送給她的八歲生日禮物，自此一人一狗形影不離，Celina說：「自小就喜歡狗狗既可愛又忠心，所以當我見到Bubble時真的好開心，我每日都會帶牠上街散步，更會親自照顧其起居飲食，絕不假手於工人。」事實上，為了幫Bubble扮得更靚仔，Celina日日上網搜刮寵物新貨：「因為Bubble係白色，所以我會專揀不同顏色，以及鑲有閃石、水晶的狗帶，方便配襯。」

部分狗帶，每條約售三千至五千元，多謝盛惠三萬多元呀！

我玩嘅公仔以有機無菌為主，咁先健康嘛！

全屬貴價貨

Celina為Bubble添置的裝備件件都屬貴價貨，如斯豪使，只因愛犬心切：「一分錢一分貨，貴價貨的質料一定較佳，好似Bubble張床仔係外國貨，無論外形、舒適度都較好，而且極耐用，Bubble瞓都瞓得舒服啲！」

狗床真皮製、鑲閃石，每張約三千幾四千蚊，型！

Celina早前去韓國旅行，為我添置了頭飾。

其實，Celina能夠這樣豪氣給Bubble置裝，全賴媽咪在背後支持，她說：「媽咪都好錫Bubble，平日都買好多衫仔、飾物給牠扮靚靚，不過媽咪經常提醒我，物質並非最重要，最重要係我養得Bubble，就要付出無限愛心、耐性，更要有始有終，絕不可以三分鐘熱度！所以，我一定會照顧Bubble終老㗎！」年紀小小的Celina所言非虛，訪問期間事事親力親為，而且不時跟Bubble錫錫，相比之下，很多大人都要為自己的不負責任行為而汗顏呢！