多姿多彩層次感豐富的民族服飾，一向是各大時裝設計師最大的靈感泉源，尤其每到夏天各大品牌更爭相推出有關產品。一向走Punk Rock路線的盧巧音近日便大玩Classic With A Twist，將民族Look「現代化」，以誇張民族配飾配搭潮服，襯出她口中的「Post-Bohemian」後現代波希米亞Look。
讀時裝出身的盧巧音（Candy）近期開始積極發展時裝事業，為明星當形象顧問及為雜誌做Styling工作和撰寫時裝專欄。雖然Candy形象一向予人好Punk Rock感覺，但她亦愛嘗試不同打扮，更愛收集各式民族味的配飾。「我出街好少着民族服，但我好鍾意買同收集民族味配飾，好似西藏同印度那類設計我就最鍾意。我的朋友每次去旅行都會買好多配飾、圍巾、珠仔鏈，甚至布料給我，我就會用來披披搭搭互相Mix n Match。」
圖１：「雖然件衫唔係牛仔布做，但衫同裙上繡花同細節都好有Cowboy Feel，而我以打結同皮帶再加強牛仔感覺。襯牛仔靴同涼鞋略嫌太大路，所以我襯對紅色高踭鞋玩嘢又突出。」
圖２：「最初揀衫唔知件衫咁短，好彩有條黑色短裙補救，令成件事好連貫，襯紅鞋亦為裝束增添Modern感覺，唔會太過七十年代。」
圖３：「橙紅色雪紡Top內襯棉質背心，質料上做出強烈對比，加上Layering式亦有民族Look那種披披搭搭的神髓。Roll-up牛仔褲同流蘇短靴有民族Feel之餘，亦為裝束加入Trendy味。」
圖４：「外國Model着白色吊帶裙襯對涼鞋已經好型好靚，但我披條圍巾同對流蘇靴就加入點點民族色彩，而粗窩釘皮帶又有少少Rock味，啱晒我風格又帶出Post Bohemian的感覺，着住去Party都唔失禮。」
並非Total Look
Candy強調襯民族Look最緊要就是舒服，不要盲目跟從潮流，唔係就會變成時裝奴隸，衫着人而不是人着衫，今次由她和其好友Raymond Leung以各種裝扮加誇張民族配飾作示範。「七十年代時期的波希米亞式裝扮頭髮會分中間界，打扮好牛仔和色調偏向Earth Tone，我今次就Twist少少，用便服襯配飾為成個造型滲入少少波希米亞色彩，而唔係由頭到腳都是民族裝扮，這就是後現代波希米亞式裝扮的構思。」
編輯民族推介
非洲鞋款
每逢春夏民族Look例必大熱，今季猶以非洲民族Look最為熱捧，力撐品牌包括 Louis Vuitton、Junya Watanabe、Ralph Lauren等。其中Louis Vuitton的一對民族流蘇珠仔高踭鞋，更被不少時裝編輯選為今季最出色鞋款之一。Gladiator涼鞋同繡花釘珠人字拖都是民族Look上佳之選。
印度電影
近年全球掀起印度熱加上電影《一百萬零一夜》效應，印度民族Look亦備受名牌追捧。電影雖以貧民生活為主題，但當中人物亦不時出現傳統印度服飾裝扮，可供大家參考。
配飾新品牌
中環擺花街新開的Titkaka亦有很多民族味配飾，好像本地設計的Mipenna Design是不錯的選擇。
Reggae音樂
源自牙買加的Reggae音樂可說最富民族色彩的一種音樂，這種音樂於六十年代開始盛行，結合了傳統的非洲節奏、美國的藍調及原始的牙買加民俗音樂。其風格包含了弱拍中音節省略，向上拍擊的結他節奏，以及人聲合唱。Reggae音樂的代表人物首推Bob Marley。
Candy民族之選
搜括地：西藏、印度、英國
「除西藏同印度外，英國都有好多民族色彩設計，因為印度以前是英國殖民地，所以引入好多印度色彩服飾。Flea Market更有很多Vintage配飾，都好適合配襯民族Look。香港方面金百利有兩間賣西藏同印度服飾店舖，亦是搜括民族服飾的好地方。」
Icon：Kate Moss
「Kate Moss着乜衫都好睇，那種不經意的配襯方法好有襯民族衫的神髓。」其實Kate Moss都鍾意民族味配飾，大家唔好忘記Minnetonka的民族流蘇靴都是由她着紅的。
品牌：Christian Lacroix、Dries Van Noten
「Dries Van Noten玩民族Look配得出神入化，佢所有布都係自己造同埋有好多細節，手工精細，所以貴得有道理。另外 Christian Lacroix的服飾都好有民族感覺，不過佢主要在顏色方面同埋以Couture手法去演繹。」
查詢：（A）3422 8568（B）2850 8684
（C）2196 8966（D）2918 0872