平凡人同大玩家嘅最大分別，係你永遠估唔到佢會捨得花幾多錢買心頭好。好似「香港變形金剛聯盟」會長Patrick，就係終極級老變Fans，拎起一盒變形金剛嘍囉問佢幾錢，Patrick話：「呢盒G1（初代）日版，一萬Yen，勁抵！」抵咩？轉眼被另一盒透明版柯柏文吸引，Patrick答：「會場限定版，一萬Yen，好貴！」原來相同價錢，G1嘍囉比特別版主角仲抵玩，完全估佢唔到，更估唔到係去一次日本玩具展，Patrick就奉獻咗七十萬日圓掃貨，點只大玩家，直頭係「狂迷」！

最經典係Patrick上年同屋企人去日本旅行，見到心頭好，都係買少少就止到痕，點知嗰年日本搞變形金剛玩具展，單拖再去就出事。「臨近玩具展，喺秋葉原中古店見到好多G1玩具，諗住逛完先一次過掃，點知行一個圈返去已經冇咗，連eBay都搵唔到架！」見好就掃都唔係問題，但一步入玩具展場館，見到會場限定版、透明特別版，有幾多掃幾多，結果買咗七大箱返香港，埋單要七十萬日圓。問Patrick到底為老變花咗幾多錢？佢話自己都計唔清，總之六位數字港紙就一定走唔甩。

當年Patrick考試高分，阿媽送隻柯柏文畀佢，盒面仲貼住$210大丸價錢牌。	日本老變玩具展嘅透明會場限定版柯柏文，Patrick見幾多掃幾多，拆一隻嚟玩，另外兩隻封盒。	Grandus大基地嘅Yahoo.jp拍賣價二萬日圓左右，買咗三盒都係曬到半黃半白，惟有繼續搵靚貨。

狂入貨 老婆都詐型

點先為之「靚貨」？其實大部分變形金剛，Patrick都有齊，但上網見到有盒個樣靚啲、上色好啲、配件齊啲，總係忍唔住手買返嚟。「日版有時個造型靚少少，又送多幾把武器，咁咪買多盒囉，諗住賣番舊嗰盒出去，結果愈儲愈多。」

去日本中古店及玩具展買咗七箱玩具，每個紙箱有成1米咁高，依家租個單位做倉，都只係夠擺部分收藏品。	天火嘅真身依然成謎，淨係知可以變成SR-71偵察機，機械人Look有冇呢張圖咁型？等電影上畫揭曉。	二代Mascot由美國官方設計，但就唔似Patrick監督嗰隻第一代識得變形。

筆者眼見Patrick嘅收藏倉內有唔少同款G1玩具，最搞笑係Grandus大基地。「機械人原本係白色，咁啱個盒用半透明包裝，擺喺舖頭曬足二十年，搞到佢半邊發黃半邊白淨；上網買過三盒，三盒都係咁，激死！」問佢會唔會再買，佢好快答「會！」難怪連佢老婆嘅口頭禪都變成:「你今個月用咗幾多錢買玩具呀？」

升值No.1：巨型日版福特	升值No.2：總司令Dai Atlas套裝	升值No.3：狂派科林巨蠍

最得寵 G1柯柏文

今時今日入晒魔，但係Patrick話細路仔時候其實對卡通唔算大感覺，阿媽買畀佢嘅變形金剛，都係玩完就算，直至二○○○年重播，先開始覺得變形金剛確係正，於是上網八吓邊度有老變玩具賣。「嗰陣巿面貨源唔多，一有好嘢，就要鬥快落舖搶，之後仲成立埋HK-TF.com網站。最大驚喜係有次執屋，竟然搵番當年阿媽買嘅G1柯柏文！」唔只同本地同好交流，依家連外國變形狂迷都Click入HK-TF，搵Patrick幫手掃香港限量貨及精品，而Patrick亦會上外國討論區及二手網搵靚貨。

會場限定炒得起入手價：400美元（eBay）現　價：800美元（eBay）賣　點：美國Botcon玩具展限定版套裝變形金剛，淨係會場先有得賣，貨源少、炒得起！

2009年︰25周年，適逢電影續集上映，當然唔少得大量新版玩具推出。

電影版 瞄準合體天火

筆者仲記得Patrick監督過一款變形金剛Mascot（人形柯柏文），大玩Cos-play文化之餘，仲要識變形，令人服到O晒嘴。上個禮拜孩之寶舉行變形金剛續集首賣會，美國官方專登設計咗二代電影嘅Mascot來港助陣，不過老實講，都係Patrick隻本地薑勁啲。至於今次嘅電影版入貨心水，Patrick認為柯柏文同天火合體版最吸引，遲啲仲有套破壞者（細個叫建造派），但要留意分為Leader、Voyager、Deluxe等唔同版本，但唔係個個版本都可以變形、合體，Fans入貨前要睇清楚。

周董都捧場

變形金剛喺一九八五年在港首播，陪住一班廿幾三十歲嘅大細路成長，唔少明星潮人都係老變粉絲，好似周杰倫做咗內地變形金剛服裝代言人，仲有陳冠希話從細就好鍾意變形金剛，最Buy係博派首領柯柏文，連農夫首《十年人事》嘅歌詞，都有「又Transform又變形金剛」，加埋孫耀威、陳柏宇同埋貽興王都力撐，下集電影Michael Bay想搵客串唔該早響。

老變25年大事記

1984年︰

孩之寶與TAKARA合作，於美國推出《Transformers》漫畫及電視。

1987年︰

全日本創作嘅「頭領戰士」面世，隔年嘅「隱者戰士」亦大受歡迎。

1993年︰

變形金剛推出「Generation 2」，三年後「Beast Wars」系列登場。

2000年︰

出過「Armada」、「Energon」及「Cybertron」等系列，可惜香港統統冇播過。

2009年︰

25周年，適逢電影續集上映，當然唔少得大量新版玩具推出。

日版喪炒最值錢

咁多年嚟Patrick大手掃貨，當中唔少都有顯著升值，「值租」程度跑贏大藍籌，Patrick豈非豬籠入水？帳面值係咁計，不過Patrick當正佢哋係寶，都唔捨得放啦！

升值No.1：巨型日版福特

入手價: $3,000

現　價：逾$10,000

賣　點：史上最巨型嘅首領福特，Patrick曾經入過三盒，日版多把劍，自然矜貴過美版。

升值No.2：總司令Dai Atlas套裝

入手價：$4,000

現　價：$8,000

賣　點：一九九○年出嘅博派總司令，可以變成飛機及坦克車形態，依家上eBay都未必搵到。

升值No.3：狂派科林巨蠍

入手價: $5,000

現　價：$8,000

賣　點：Patrick喺日本搵到，依家仲貼住¥73,500價錢牌，係少數被炒嘅狂派領袖。

會場限定炒得起

入手價：400美元（eBay）

現　價：800美元（eBay）

賣　點：美國Botcon玩具展限定版套裝變形金剛，淨係會場先有得賣，貨源少、炒得起！

個人Profile

稱　　呼：Patrick

收藏年資：九年

對　　象：變形金剛

戰　　績：珍藏數量多到連自己都數唔清，要租個單位安置。最癲一次去日本，掃咗七大箱變形金剛，埋單七十萬日圓。