三防機：西門子S10 D-active
「Ericsson推出R320三防機之前，西門子已經有S10 D-active，好襟用，仲有橙色款，不過我只係搵到黑色款。」（筆者按：這是一九九八年的出品，早已停產，除黑色、橙色，還有綠色。）
錄音筆手機
「海爾推出嘅錄音筆手機，設計好特別，又好易放落袋，所以我買咗兩部，呢部係我搵人加咗迷彩花紋，白色款用嚟收藏。」
內置天線手機：Hagenuk Global-Handy
「我一直以為首部內置天線嘅手機來自Nokia，原來其實係『Hagenuk』嘅Global-Handy至真，我都貯咗兩部。後來法拉利同呢個品牌Crossover，推出咗紅色及黃色嘅法拉利版手機，外形同原裝差唔多，我都儲齊咗。」
稀有珍藏
Orange Videophone
「冇型號名，呢部機就叫Orange Videophone，由英國Orange生產，行WinCE 3.0，亦係第一部支援Videocall嘅手機，利用當時嘅HSCSD（註：即連線速度達28.8kpbs）流動上網操作，不過買番嚟嘅時候，只可以打電話。」筆者翻查資料，此機當時身價高達一千三百英鎊，以每秒十二格的速度作Video call！
水壺電話
「呢部水壺，我搵咗好耐；當時嘅GSM水壺有兩款天線替換，不過喺夜冷店搵到嘅，通常係冇天線。白色嗰部用Analog制式，如果大家仲記得，即係成日畀人勾線嗰款。」
最愛小露寶
「StarTAC、Serene、Serenata，同埋『小露寶』，都係我的最愛，尤其是當時Sony推出嘅手機，每部都好有型，特別係俗稱『小露寶』嘅CMD-Z1，可惜依家冇呢種手機。B&O機款嘅音式及設計都一流，而且Serene插喺Cradle上面好像一把斧頭，幾得意。StarTAC更加唔使講，絕對係一代經典，我就收藏咗黑色、紫色及彩色款。」
Sidekick系列
「Sidekick第一代只可以喺美國用，由於屏幕用咗好特別嘅方法轉出嚟，所以就算用唔到，都決定買番嚟貯。由第二代開始，Sidekick支援GSM，不過全英文介面始終唔方便，所以我賣咗畀朋友，反而保留第三代；第四代雖然顏色特別，不過改咗由Motorola製造，竟然變成滑蓋，令人好失望。」
親子手機
「設計喺熊仔手腳預設唔同嘅電話號碼，小朋友按住手腳，就會自動打到電話畀唔同嘅人。我喺網上搵到呢部手機嘅資料，要打電話去台灣廠商訂，仲要親自去嗰邊攞機。綠色嗰部親子機，係喺華員會倒閉前買落，另有一番意義。」