長假後港股繼續牛皮，這又難怪，美股衝唔上去年底高位，加上內地股市無假放，資金在假期前減磅已是意料中事，而且近排外圍無特別消息，令昨日恒指即市波幅僅136點。恒指昨收報20,366點，升20點，主板成交縮至600億元。

走勢上，恒指自二月開始反彈至今，營造穩定上升通道，10日及20日線亦已上破50日線，中線走勢睇落雖唔錯，但近期大市成交日縮，MACD牛叉收窄得甚快，現價先開好倉似乎又欠缺值博率。

另外，三月期指昨收報20,349點，升30點，總成交張數10.8萬張；至於四月期指日間時段收報20,363點，升57點，總成交張數得7.4萬張，未平倉合約則有6.4萬張，從四月份成交所見，資金對後市選擇做好還是做淡仲係心大心細。

策略上，筆者上周減磅至三分一好倉後，恒指現貨昨力守20,168點止蝕位，故繼續持倉，但考慮到短期方向未明，故續以較少張數坐過夜之策略應對，博之後「東風到」。