零售市況持續淡靜，核心區主要街舖為免空置，業主亦要暫時租畀短租商戶。劉Sir八到旺角星際城市一個面向西洋菜南街舖位，新近以約25萬元短租畀手提電話配件店，僅為長租叫租嘅一半；另外深水埗荔枝角道一個地舖新近亦以低市價逾兩成約1,660萬元沽出，較去年九月叫價大劈一半。

旺角星際城市錄得舖位短租個案。（資料圖片）

各區舖位最新市況

有老友代理同劉Sir講，星際城市一個面向西洋菜南街嘅山東街雙號地舖，面積約700方呎，最近以約25萬元短租畀手提電話配件店，現時舖位長租叫租約莫50萬元，即短租租金僅係長租嘅一半，聽講前租戶係藥房，當時月租高達88萬元。

其實嗰間手提電話配件店早前已經積極進駐核心區，好似喺同區彌敦道及銅鑼灣怡和街亦有短租舖。

另有消息話，尖沙咀漆咸道南單號金馬倫中心地舖，面積約760方呎，以約12萬元租出，舊租戶係韓國電話品牌專門店。

同區金馬倫道雙號一個原由火鍋店承租嘅一樓A至C號全層，面積約2,800方呎，新近以約17萬元租出，較舊租金逆市高逾三成。

深水埗地舖賣平27%

舖市氣氛麻麻，二線區亦出現舖位劈價個案，美聯旺舖鮑昌華就話，深水埗荔枝角道311至313號地下A號舖，面積約1,200方呎連約1,000方呎入則閣樓，以約1,660萬元連租約沽，較市值低逾27%，而舖位去年九月曾叫價3,380萬元，即今次大劈價逾五成。

祥益地產總裁汪敦敬同劉Sir講，新近以990萬元購入屯門翠寧花園商場地下租用多年的龍頭舖位，面積約479方呎，呎價約20,668元，佢仲話雖然舖位早前叫價1,400萬元，但估計舖價繼續向下，今次算係買貴左，不過買嚟做自用舖可以令集團生意更穩定，而早前買入同區栢麗廣場一個單位亦係長線投資，估計五年內可升值四至六成。

新地9商場丁財兩旺

新鴻基地產代理租務部總經理鍾秀蓮就話，新地九大商場喺復活節四天假期共吸引605萬人流，營業額3.54億元，均較去年升一成，另預料三月份全月人流及營業額分別為3,363萬及12.95億元，按年都升9%；四月份人流及營業額料為3,288萬及11.96億元，均按年上升5%。