美股隔晚七連升，創去年十月以來最長升浪，到底眼前升市係咪海市蜃樓，真係有理說不清。事實上，帶動今輪反彈浪的都係周期性股份，後市升勢能否持續，關鍵就睇接下來的企業季績及經濟季度數據能否為好友給力！

內地4G市場競爭激烈，惟中移下半年業績可望好轉。（資料圖片）

太陽日誌

執筆時傳來布魯塞爾機場及歐盟總部附近地鐵站發生爆炸，如果又係恐怖分子所為，照計好快有人舉手認頭。不過，事件發生喺復活節長假前，唔多唔少影響度假心情。畢竟人在暗你在明，防不勝防，惟有隨遇而安。

講到長假旅遊，東瀛遊（06882）派一五年成績表，全年純利1.5億元，按年增長1.02倍，毛利率增3.2個百分點至23.4%，以每股盈利29.95仙計，往績市盈率降至7.8倍，息率6厘，睇數據真係幾吸引！講真呢兩年上市的新股，快速走樣的唔少，用心經營成績斐然的唔多，東瀛遊算係交得足功課！

東瀛遊交足功課

不過，尋日該股股價不升反跌4.47%，收報2.35元，相信部分原因係對比去年上半年賺8,444萬元，下半年盈利算是平平穩穩而已。另一個說法就係，最近日圓轉強，唔多唔少影響遊日意欲。

筆者就認為，安倍政府洗濕咗個頭，負利率都行埋，繼續印銀紙肯定唔會有回頭路，日圓匯價根本冇幾多反彈本錢，展望今年，日、韓仍為大熱旅遊地點，加上東瀛遊本身積極開拓旅遊配套等增值服務，盈利前景展望穩定，每次股價回落至2.2元樓下，都可視為中線收集的機會。

蘋果公司正式發布新款iPhone和iPad Pro，基本上，兩個產品的規格在發布會前經已在市場廣泛流傳，正式公布的內容冇咩出入，所以市場並冇驚喜。由於部iPhone SE用番4吋屏幕，相信睇開咗大啲芒的iPhone6或iPhone6s客降級換機的意欲唔大。所以對於iPhone SE的銷情，筆者都唔敢太奢望。

至於iPad Pro，純以炒機角度，也許勝過iPhone SE，但兩者對正在下滑的蘋果公司銷售，刺激作用唔大，今年焦點仍落在傳聞會於第三季推出的iPhone7。難怪尋日幾隻蘋果概念股冇咩大反應，瑞聲科技（02018）及富智康（02038）同跌逾1%，高偉電子（01415）跌5%，短期內可放埋一邊唔使睇。

尋日兩地股指都以整固為主，升得咁上下就要抖吓氣，冇咩微言大義。異動股有新世界中國（00917），公司在前日收市後宣布達成私有化條件，下月將撤銷上市地位，聽講有大戶早前睇死私有化建議煲冇米粥，故落場沽空，點知今次係堅成功，想補倉，隻股本身流通量唔多，畀人夾到眼定定就梗啦！

新中夾死沽空客

尋日午後新中股價一度飆上11元，收報9.5元，成交1.19億元，有貨沽到高位真係Bonus！查實沽空股票呢家嘢都係賭博味重，沽得就要預咗有機會被夾爆，食得鹹魚要抵得渴！

三大中資電訊股，有兩隻經已派咗成績表。中移（00941）舊年賺1,085億元人民幣，ARPU降至56元人民幣。資費下調乃大趨勢，加上4G競爭激烈，呢份業績係市場預期之內。展望今年，預期資本性開支冇咩下降空間，但明年及後年就會見頂回落。

舊年下半年實施的流量單月不清零，影響去年盈利約78億元人民幣，今年上半年在同比基礎有別之下會有偏差，但下半年相關影響就會消失，從呢個角度睇，今年次季至第三季初會是收集中移的好時機。

至於聯通（00762），其實受行業政策負面影響大於中移，今年盈利表現唔樂觀，但勝在一日未成事實，一日都可以炒作同中電信（00728）謀合併的傳言。三大之中，以基本因素計，大阿哥中移始終係芬佬首選。至於話下半年深港通若順利推出，中移係三大之中唯一同胞們唔能夠直接喺A股市場買到，而又無人不識的品牌，要炒揀邊隻，應該唔使傷腦筋！